Расія павялічвае імпарт бензіну з Беларусі з-за атак беспілотнікаў на расійскія НПЗ
Расія ў сакавіку павялічыла імпарт бензіну з Беларусі, каб зменшыць рызыку дэфіцыту на ўнутраным рынку з-за пазапланавых рамонтаў на расійскіх нафтаперапрацоўчых заводах пасля нападаў беспілотнікаў, піша Reuters.
Звычайна Расія зʼяўляецца чыстым экспарцёрам і пастаўшчыком паліва на міжнародныя рынкі, але збой у расійскай нафтаперапрацоўцы вымусіў нафтавыя кампаніі імпартаваць.
Праблемы ўзніклі з-за атак беспілотнікаў па нафтаперапрацоўчых прадпрыемствах у Расіі і іх пазапланавых рамонтаў. Ужо ў лютым адзначалася скарачэнне перапрацоўкі нафты.
Калі ў студзені паставак з Беларусі ў Расію не было, у лютым 2024-га РФ імпартавала з Беларусі 590 тон бензіну, дык у першай палове сакавіка — амаль 3 тысячы тон. Цяпер паміж урадамі і нафтавымі кампаніямі ідзе абмеркаванне далейшага імпарту з РБ. Паводле Reuters, беларуска-расійскія перамовы ідуць складана, паколькі для Беларусі прыярытэтам зʼяўляюцца пастаўкі аўтамабільнага паліва на міжнародныя рынкі (яны ў асноўным ідуць праз расійскія парты), а не ў РФ.
Расійскі бок, паводле выдання, прапаноўваў дадатковыя пастаўкі нафты на беларускія НПЗ у абмен на павялічванне паставак нафтапрадуктаў з РБ.
У Беларусі ёсць два нафтаперапрацоўчыя заводы — Наваполацкі НПЗ «Нафтан» і Мазырскі НПЗ.
Прадукцыйнасць кожнага з іх складае 12 мільёнаў тон у год, але яны звычайна працуюць з меншай магутнасцю, кожны з якіх перапрацоўвае каля 9 мільёнаў тон у год.
Пакуль незразумела, наколькі Беларусь можа павялічыць вытворчасць, і крыніцы ў галіне кажуць аб наяўнасці тэхнічных вузкіх месцаў для гэтага.
Цяпер чытаюць
Паступова выйшлі на волю арыштаваныя па «Справе кнігароў». Акрамя аднаго5
Каментары