Rasija pavialičvaje impart bienzinu ź Biełarusi z-za atak bieśpiłotnikaŭ na rasijskija NPZ
Rasija ŭ sakaviku pavialičyła impart bienzinu ź Biełarusi, kab źmienšyć ryzyku deficytu na ŭnutranym rynku z-za pazapłanavych ramontaŭ na rasijskich naftapierapracoŭčych zavodach paśla napadaŭ bieśpiłotnikaŭ, piša Reuters.
Zvyčajna Rasija zjaŭlajecca čystym eksparcioram i pastaŭščykom paliva na mižnarodnyja rynki, ale zboj u rasijskaj naftapierapracoŭcy vymusiŭ naftavyja kampanii impartavać.
Prablemy ŭźnikli z-za atak bieśpiłotnikaŭ pa naftapierapracoŭčych pradpryjemstvach u Rasii i ich pazapłanavych ramontaŭ. Užo ŭ lutym adznačałasia skaračeńnie pierapracoŭki nafty.
Kali ŭ studzieni pastavak ź Biełarusi ŭ Rasiju nie było, u lutym 2024-ha RF impartavała ź Biełarusi 590 ton bienzinu, dyk u pieršaj pałovie sakavika — amal 3 tysiačy ton. Ciapier pamiž uradami i naftavymi kampanijami idzie abmierkavańnie dalejšaha impartu z RB. Pavodle Reuters, biełaruska-rasijskija pieramovy iduć składana, pakolki dla Biełarusi pryjarytetam zjaŭlajucca pastaŭki aŭtamabilnaha paliva na mižnarodnyja rynki (jany ŭ asnoŭnym iduć praz rasijskija party), a nie ŭ RF.
Rasijski bok, pavodle vydańnia, prapanoŭvaŭ dadatkovyja pastaŭki nafty na biełaruskija NPZ u abmien na pavialičvańnie pastavak naftapraduktaŭ z RB.
U Biełarusi jość dva naftapierapracoŭčyja zavody — Navapołacki NPZ «Naftan» i Mazyrski NPZ.
Pradukcyjnaść kožnaha ź ich składaje 12 miljonaŭ ton u hod, ale jany zvyčajna pracujuć ź mienšaj mahutnaściu, kožny ź jakich pierapracoŭvaje kala 9 miljonaŭ ton u hod.
Pakul niezrazumieła, nakolki Biełaruś moža pavialičyć vytvorčaść, i krynicy ŭ halinie kažuć ab najaŭnaści techničnych vuzkich miescaŭ dla hetaha.
Ciapier čytajuć
«Ja skazaŭ na videa, što mianie nie katujuć — na toj momant heta było praŭdaj. A praź dźvie hadziny mianie źbili». Ukrainski žurnalist dva hady pravioŭ u rasijskim pałonie — voś što jon pieražyŭ1
Kamientary