«Вы выратавалі Eўропу». У Нармандыі Зяленскі пакланіўся ветэрану-амерыканцу, сыну выхадцаў з Беларусі
Гэтая гісторыя прыцягнула ўвагу вялікай колькасці заходніх сродкаў масавай інфармацыі, піша Радыё Свабода.
Прэзідэнт Украіны Уладзімір Зяленскі ў часе свайго ўдзелу ў цырымоніі з нагоды 80-й гадавіны высадкі войскаў саюзнікаў у Нармандыі падзякаваў амерыканскаму ветэрану Другой сусветнай вайны Мэлвіну Гурвіцу за выратаванне Еўропы ад фашызму.
Эмацыйная размова амерыканскага ветэрана і ўкраінскага прэзідэнта транслявалася на вялікіх экранах пад воплескі тысяч людзей, якія сабраліся на пляцы Амаха ў Нармандыі (Францыя) 6 чэрвеня, каб адзначыць 80-ю гадавіну падзеі ў часе Другой сусветнай вайны.
Калі кіраўнікі замежных дэлегацый віталі ветэранаў Другой сусветнай вайны, Мэлвіну Гурвіцу спачатку паціснуў руку прэмʼер-міністр Канады Джастын Трудо. Ён жа прадставіў амерыканскаму ветэрану прэзідэнта Украіны.
Калі Зяленскі працягнуў руку для вітання, Мэлвін Гурвіц паспрабаваў яе пацалаваць. Прэзідэнт Украіны не дазволіў гэта зрабіць і эмацыйна выгукнуў: «Не-не-не!», прысеў на калені перад ветэранам і абняў яго.
«Вы выратавалі народ», — сказаў 99-гадовы Мэлвін Гурвіц Зяленскаму, а той яму адказаў: «Не-не-не, гэта вы выратавалі Еўропу. Вы наш герой».
Асобу Мэлвіна Гурвіца пацвердзіла ягоная стрыечная пляменніца Сара Гурвіц Робі. Яна паведаміла, што яе дзядзька прысутнічаў на цырымоніі ад імя Best Defence Foundation — некамерцыйнай арганізацыі, якая арганізоўвае сустрэчы для ветэранаў Другой сусветнай вайны. Паводле арганізацыі, Мэлвін Гурвіц быў прызваны ў 8-ю ваенна-паветраную армію ЗША і служыў у якасці радыста на В-17, масіўным бамбавіку, вядомым як Лятучая крэпасць.
Пазней Шымон Брыман — ізраільскі журналіст, які паходзіць з Харкава (Украіна), на сваёй старонцы ў Facebook паведаміў, што Мэлвін Гурвіц зʼяўляецца сынам габрэяў Барыса (Біньяміна) Гурвіца і Раі (Рахель) Пушкінай, якія пасля рэвалюцыі 1917 года ўцяклі з Віцебска ў ЗША.
«У Балтыморы ў 1920—1926 гадах у іх нарадзіліся чатыры сыны. Адзін з іх — Мэлвін Гурвіц, 1925 года нараджэння, вырас і паступіў у каледж, але ў 1943-м яго прызвалі ў армію, прайшоў падрыхтоўку ў навучальных цэнтрах армейскай авіяцыі і з 1944 года ваяваў стралком-радыстам на B-17 «Лятучая крэпасць», — напісаў ён.
Паводле Шымона Брымана, бамбавік Мэлвіна Гурвіца B-17 меў жартоўную мянушку «Дэзарганізаваная блытаніна» і ажыццявіў чатыры баявыя вылеты. Зімой і вясной 1945 году самалёт Гурвіца дастаўляў харч жыхарам Нідэрландаў, якія галадалі, і вяртаў з Аўстрыі французскіх палонных.
«Па вяртанні ў ЗША экіпаж пачаў трэніроўкі на B-29 для падрыхтоўкі да вайны ў Японіі, але ў чаканні адпраўкі на Ціхі акіян вайна закончылася. Мэлвін Гурвіц шчасліва стварыў сям’ю, якая і цяпер атачае яго любоўю. У сакавіку 2024 году ён адзначыў 99-ы дзень нараджэння палётам на баявым самалёце часоў свайго юнацтва», — расказаў Шымон Брыман.
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч1919
Каментары