«Vy vyratavali Eŭropu». U Narmandyi Zialenski pakłaniŭsia vieteranu-amierykancu, synu vychadcaŭ ź Biełarusi
Hetaja historyja pryciahnuła ŭvahu vialikaj kolkaści zachodnich srodkaŭ masavaj infarmacyi, piša Radyjo Svaboda.
Prezident Ukrainy Uładzimir Zialenski ŭ časie svajho ŭdziełu ŭ cyrymonii z nahody 80-j hadaviny vysadki vojskaŭ sajuźnikaŭ u Narmandyi padziakavaŭ amierykanskamu vieteranu Druhoj suśvietnaj vajny Mełvinu Hurvicu za vyratavańnie Jeŭropy ad fašyzmu.
Emacyjnaja razmova amierykanskaha vieterana i ŭkrainskaha prezidenta tranślavałasia na vialikich ekranach pad vopleski tysiač ludziej, jakija sabralisia na placy Amacha ŭ Narmandyi (Francyja) 6 červienia, kab adznačyć 80-ju hadavinu padziei ŭ časie Druhoj suśvietnaj vajny.
Kali kiraŭniki zamiežnych delehacyj vitali vieteranaŭ Druhoj suśvietnaj vajny, Mełvinu Hurvicu spačatku pacisnuŭ ruku premjer-ministr Kanady Džastyn Trudo. Jon ža pradstaviŭ amierykanskamu vieteranu prezidenta Ukrainy.
Kali Zialenski praciahnuŭ ruku dla vitańnia, Mełvin Hurvic pasprabavaŭ jaje pacałavać. Prezident Ukrainy nie dazvoliŭ heta zrabić i emacyjna vyhuknuŭ: «Nie-nie-nie!», prysieŭ na kaleni pierad vieteranam i abniaŭ jaho.
«Vy vyratavali narod», — skazaŭ 99-hadovy Mełvin Hurvic Zialenskamu, a toj jamu adkazaŭ: «Nie-nie-nie, heta vy vyratavali Jeŭropu. Vy naš hieroj».
Asobu Mełvina Hurvica paćvierdziła jahonaja stryječnaja plamieńnica Sara Hurvic Robi. Jana paviedamiła, što jaje dziadźka prysutničaŭ na cyrymonii ad imia Best Defence Foundation — niekamiercyjnaj arhanizacyi, jakaja arhanizoŭvaje sustrečy dla vieteranaŭ Druhoj suśvietnaj vajny. Pavodle arhanizacyi, Mełvin Hurvic byŭ pryzvany ŭ 8-ju vajenna-pavietranuju armiju ZŠA i słužyŭ u jakaści radysta na V-17, masiŭnym bambaviku, viadomym jak Latučaja krepaść.
Paźniej Šymon Bryman — izrailski žurnalist, jaki pachodzić z Charkava (Ukraina), na svajoj staroncy ŭ Facebook paviedamiŭ, što Mełvin Hurvic zjaŭlajecca synam habrejaŭ Barysa (Bińjamina) Hurvica i Rai (Rachiel) Puškinaj, jakija paśla revalucyi 1917 hoda ŭciakli ź Viciebska ŭ ZŠA.
«U Bałtymory ŭ 1920—1926 hadach u ich naradzilisia čatyry syny. Adzin ź ich — Mełvin Hurvic, 1925 hoda naradžeńnia, vyras i pastupiŭ u kaledž, ale ŭ 1943-m jaho pryzvali ŭ armiju, prajšoŭ padrychtoŭku ŭ navučalnych centrach armiejskaj avijacyi i z 1944 hoda vajavaŭ strałkom-radystam na B-17 «Latučaja krepaść», — napisaŭ jon.
Pavodle Šymona Brymana, bambavik Mełvina Hurvica B-17 mieŭ žartoŭnuju mianušku «Dezarhanizavanaja błytanina» i ažyćciaviŭ čatyry bajavyja vylety. Zimoj i viasnoj 1945 hodu samalot Hurvica dastaŭlaŭ charč žycharam Niderłandaŭ, jakija haładali, i viartaŭ z Aŭstryi francuzskich pałonnych.
«Pa viartańni ŭ ZŠA ekipaž pačaŭ treniroŭki na B-29 dla padrychtoŭki da vajny ŭ Japonii, ale ŭ čakańni adpraŭki na Cichi akijan vajna zakončyłasia. Mełvin Hurvic ščaśliva stvaryŭ siamju, jakaja i ciapier atačaje jaho luboŭju. U sakaviku 2024 hodu jon adznačyŭ 99-y dzień naradžeńnia palotam na bajavym samalocie časoŭ svajho junactva», — raskazaŭ Šymon Bryman.
«Pavinien vyjści Pačobut». Polski ministr Sikorski znoŭ zahavaryŭ pra mahčymaje zakryćcio miažy dla hruzaŭ14
Kamientary