Таямніца, ці піша Мядзведзеў свае пагрозы ў Telegram самастойна, верагодна, раскрытая.
Украінскія хакеры з групоўкі «Кібер Спротив» у пачатку года ўзламалі электронную пошту людзей з блізкага асяроддзя Дзмітрыя Мядзведзева і на працягу 6 месяцаў назіралі за іх перапіскамі паміж сабой і з самім палітыкам.
Падрабязнасці і ўсю спампаваную інфармацыю хакеры перадалі буйному выведвальнаму парталу InformNapalm.
Паводле ўцечак, галоўным спічрайтарам і сцэнарыстам Мядзведзева з'яўляецца адзін з яго асабістых памочнікаў у Радзе Бяспекі РФ Аляксей Заклязьмінскі.
Ён рыхтуе Мядзведзева да публічных выступленняў, піша дакументы і артыкулы пад аўтарствам палітыка і дапамагае яму друкаваць пагрозлівыя пасты ў сацсетках.
Сам Заклязьмінскі, зыходзячы з ягонай узламанай пошты, у мінулым працаваў настаўнікам біялогіі, а цяпер актыўна калекцыянуе расійскія псеўданавуковыя публікацыі пра тэорыі змовы, а таксама пра ўплыў wi-fi і гаджэтаў на мозг і асобу чалавека.
Так, у адной з публікацый у пошце Заклязьмінскага сказана, што падчас карыстання прыладамі дзеці ў біялагічным сэнсе перастаюць быць людзьмі.
Акрамя таго, хакеры спампавалі з пошты Заклязьмінскага сцэнары публічных выступленняў з удзелам Мядзведзева з вельмі дэталёвымі раскладамі дзеянняў і рэплік па часе.
Напрыклад, сцэнар падключэння дома ў Ленінградскай вобласці да газавай сеткі. Тут прапісана, што перад падключэннем газу да дома гендырэктар «Газпрома» па Ленінградскай вобласці Вячаслаў Бузін робіць даклад і кажа наступнае.
«Паважаныя Дзмітрый Анатольевіч (Мядзведзеў) і Аляксандр Валянцінавіч (Новак), дазвольце падключыць дом сям'і Калінкіна да сетак газаразмеркавання?»
Далей Мядзведзеву і Новаку прапісваюць рэпліку: «Дазваляем!»
Разам з гэтым Заклязьмінскі старанна рэдагуе публічныя заявы Мядзведзева для СМІ. У адным са здабытых файлаў хакеры знайшлі чарнавы варыянт артыкула Мядзведзева для «Расійскай газеты» аб выніках 2022 года і «канчатковай змене свету».
Характэрна, што ў выпраўленнях і каментарах да тэксту Заклязьмінскі сам робіць памылкі (напрыклад, «слишком пессимЕстично»).
Што знайшлі яшчэ?
Таксама ў пошце Заклязьмінскага хакеры знайшлі скаргі расійскіх абаронных прадпрыемстваў з-за ўвядзення супраць іх заходніх санкцый.
Так, кіраўніцтва «Тульского патронного завода» заявіла аб рэзкім падзенні аб'ёму продажаў патронаў праз санкцыі, бо 85% вытворчасці ішло на экспарт (у тым ліку ў ЗША), і таму завод папрасіў дзяржаўныя структуры РФ больш закупляць патроны.
Яшчэ звяртае на сябе ўвагу дакумент аб рэкамендацыях па дзяржаўнай палітыцы Расіі ў Арктычным рэгіёне, падрыхтаваны аналітыкамі Вышэйшай школы эканомікі (ВШЭ).
У ім, сярод іншага, прапануецца «істотна павялічыць» марскую дзяржаўную тэрыторыю РФ у Арктыцы шляхам «удакладнення» ліній існуючых межаў, а таксама размясціць у Арктыцы ядзерную зброю «для вайсковага кантролю недружалюбных дзяржаў у рэгіёне».
Нагадаем, што нядаўна Расія публічна выказала намер «удакладніць» свае межы ў Балтыйскім моры і тым самым юрыдычна далучыць да сябе частку марскіх тэрыторый балтыйскіх краін.
Каментары