Марзалюк: У любой школе, у тым ліку ў рускамоўнай, гісторыю Беларусі і геаграфію трэба выкладаць па-беларуску
«Ёсць нейкія сімвалічныя палі, на якіх павінен быць прыярытэт беларускай мовы».
![Ігар Марзалюк Игорь Марзалюк Igor Marzalyuk](http://nashaniva.com/img/w840d4webp1/photos/z_2024_07/-urpdy.jpg.webp)
Свой погляд на месца беларускай мовы ў выкладанні гісторыі Беларусі і геаграфіі член-карэспандэнт Нацыянальнай акадэміі навук Беларусі і дэпутат Ігар Марзалюк выказаў журналісту «Мінскай праўды» Юрыю Увараву.
Палітык запэўнівае, што ён за «рэальнае двухмоўе, і зразумела, за захаванне беларускай мовы». Марзалюк прызнаўся, што думае на беларускай мове, і заўважыў, што закончваў беларускамоўную школу.
«Сітуацыя двухмоўя (а бывае трох, чатырохмоўе) не азначае смерці нацыянальнай ідэнтычнасці, нацыянальнай культуры», — лічыць прафесар і прыводзіць у якасці прыкладу Швейцарыю.
У той жа час ён адзначае:
«Калі гаварыць шчыра, то я лічу, што беларуская дзяржава дэманструе ўзважаны, збалансаваны падыход. Ён правільны. Іншая справа, з майго пункту погляду, ёсць нейкія сімвалічныя палі, на якіх павінен быць прыярытэт беларускай мовы.
Я лічу, што ў любой школе (у тым ліку ў рускамоўнай), выкладаць гісторыю Беларусі, геаграфію Беларусі, грамадазнаўства, з майго пункту гледжання, трэба на беларускай мове. У тым ліку для таго, каб даваць моўную практыку, каб ведаць мову».
Каментары