«Тэракт», за які асудзілі немца Крыгера, зладзілі беларускія сілавікі — версія Белпола
Белпол правёў уласнае расследаванне і апісвае, што насамрэч магло адбыцца з Крыгерам у Беларусі.
Белпол сумесна з Супольнасцю чыгуначнікаў Беларусі і іншымі партнёрамі сабраў і пераправерыў звесткі па справе грамадзяніна Германіі Рыка Крыгера.
Белпол прыйшоў да высновы, што «тэракт» зладзілі сілавікі і скарысталіся наіўнасцю Крыгера.
Прыводзім асноўнае з іх версіі.
Белполаўцы звяртаюць увагу, што выбуховае прыстасаванне (яно было ў заплечніку, які Крыгеру загадалі пакласці на рэйкі) спрацавала не на асноўных чыгуначных каляінах, а паміж другаснымі (№4 і №5), якія выкарыстоўваюцца для манеўраў. У выніку былі пашкоджаны дзве шпалы і парушана геаметрыя рэйкі. На аднаўленне было затрачана дзве гадзіны. Кошт склаў 1639 рублёў 66 капеек.
Падрыў адбыўся 5 кастрычніка 2023 года ў 23.22. За паўгадзіны да і паўгадзіны пасля па каляінах №4 і №5 не планавалася руху. Да таго ж у гэты перыяд і наступныя дні не былі запланаваны ніякія вайсковыя перавозкі праз станцыю «Азярышча».
Месца падрыву, адзначае Белпол, добра фіксуецца камерамі відэаназірання чыгуначнай станцыі. Для правядзення тэракту можна было выбраць месца за станцыяй, якое не праглядаецца камерамі і дзе ўсяго два чыгуначныя палотны.
Такім чынам, выбух па сваёй магутнасці і часе правядзення ніяк не мог перашкодзіць чыгуначнаму руху праз «Азярышча», не гаворачы пра магчымасць перашкодзіць вайсковым перавозкам ці пасажырскім цягнікам.
Яшчэ адзін важны момант, на які звяртае ўвагу Белпол, — у прапагандысцкім фільме пра Крыгера сцвярджаюць, што ён збіраўся ўступіць у замежны батальён «Вестэрн» (адзінка ў складзе палка Кастуся Каліноўскага) не пазней за 20 верасня 2023. Але аб стварэнні батальёна было абвешчана толькі 25 верасня.
У прапагандысцкім фільме казалі, што немец у Асіповічах здымаў вайсковую тэхніку і тэрыторыю вайсковай часткі 97115.
Выклікае пытанне і неабходнасць маршрутызацыі Крыгера Службай бяспекі Украіны (СБУ). Усе аб'екты, што ён фатаграфаваў, ёсць на гугл-картах і актуальных спадарожнікавых здымках, якія даступныя СБУ.
Белполаўцы заўважаюць, што Крыгер не з'яўляецца спецыялістам у вайсковых пытаннях і не мае ніякіх навыкаў абыходжання з выбуховымі прыстасаваннямі. Акрамя гэтага, як замежнік ён выдзяляўся сярод мясцовага насельніцтва, што стварала дадатковую небяспеку. Такія дзеянні са значна меншай рызыкай мог здзейсніць любы мясцовы жыхар.
Што насамрэч адбылося з Крыгерам?
Белполаўцы прыводзяць сваю версію таго, што здарылася з Рыкам Крыгерам.
Жыхар Германіі ў сілу асабістых абставін вырашыў змяніць сваё жыццё і ўступіць у якое-небудзь інтэрнацыянальнае падраздзяленне Узброеных сіл Украіны.
Падчас пошукаў інфармацыі ў інтэрнэце ў верасні 2023 года ён натрапіў на падстаўны акаўнт, які быў пад кантролем сілавікоў Беларусі. З Крыгерам па відэасувязі размаўляў не супрацоўнік СБУ «Мікалай» а супрацоўнік беларускіх спецслужбаў.
Падстаўны супрацоўнік пераканаў Крыгера прыехаць у Беларусь для «праверкі», не раскрываючы яе падрабязнасцей. Для таго, каб паскорыць яго прыезд, а таксама каб пазбегнуць траплення ў поле зроку германскіх спецслужбаў, Крыгер прыляцеў у Беларусь праз Азербайджан. Гэта не патрабавала наяўнасці беларускай візы, бо па прыбыцці ў краіну праз аэрапорт дзейнічае бязвізавы рэжым.
Мужчына прыляцеў у Беларусь з квадракоптарам (беспілотнікам) 2 кастрычніка 2023 года. А беларускае заканадаўства з 25 верасня таго ж года забараніла іх увоз на тэрыторыю Беларусі фізічнымі асобамі.
Квадракоптар «шпіёна» каштуе каля 110 еўра, яго батарэі хапае на 9-10 хвілін палёту, а дальнасць палёту — 40 метраў. Такі беспілотнік зусім не годны для шпіёнскай дзейнасці.
Белполаўцы ўпэўненыя, што аперацыя сілавікоў з Рыка Крыгерам — гэта правакацыя.
Заданні па фота— відэаздымках аб'ектаў у Асіповічах неабходны былі для стварэння матэрыяльных доказаў «агентурнай дзейнасці ў інтарэсах СБУ».
Белполаўцы сцвярджаюць, што ў рукзаку, які забраў Крыгер з тайніка і не цікавіўся яго змесцівам, знаходзіўся муляж выбуховай прылады. Пасля мужчына атрымаў заданне пакласці рукзак каля чыгуначных шляхоў, зрабіць фота і адправіць куратару. Ніякіх інструкцый аб устаноўцы самаробнага выбуховага прыстасавання яму не давалі.
Белпол лічыць, што падрыў быў здзейснены самімі сілавікамі. Для кантролю за сітуацыяй у ноч з 5 на 6 кастрычніка 2023 года некаторыя супрацоўнікі кіраўніцтва Беларускай чыгункі знаходзіліся на працоўных месцах, а на шэрагу аб'ектаў чыгункі прысутнічалі афіцэры КДБ. Менавіта па іх указанні чыгуначнае злучэнне па станцыі «Азярышча» пасля таго, як адбыўся выбух, не перакрывалася.
Аляксандр Лукашэнка памілаваў Рыка Крыгера
Прапаганда паказала фільм пра Крыгера. З яго вынікае, што немца мог разыграць КДБ, а пытанняў болей, чым адказаў
«Раптам не прыйшоў на працу, а праз пару дзён яго затрымалі». Новыя падрабязнасці пра немца, прысуджанага да расстрэлу ў Беларусі
Магутнасць выбуху на станцыі Азярышча даволі высокая, але асаблівых пашкоджанняў няма — Супольнасць чыгуначнікаў
Каментары
Калі вы мянты сапраўдныя, то ад вас чакаюць вынікаў аператыўнай працы, прыцягнення злачынцаў да адказнасці, абароны інтарэсаў беларусаў, а не юц'юбчыкі піліць. Ці па-за грантамі не працуем?