«Terakt», za jaki asudzili niemca Kryhiera, zładzili biełaruskija siłaviki — viersija Biełpoła
Biełpoł pravioŭ ułasnaje rasśledavańnie i apisvaje, što nasamreč mahło adbycca z Kryhieram u Biełarusi.
Biełpoł sumiesna z Supolnaściu čyhunačnikaŭ Biełarusi i inšymi partniorami sabraŭ i pierapravieryŭ źviestki pa spravie hramadzianina Hiermanii Ryka Kryhiera.
Biełpoł pryjšoŭ da vysnovy, što «terakt» zładzili siłaviki i skarystalisia naiŭnaściu Kryhiera.
Pryvodzim asnoŭnaje ź ich viersii.
Biełpołaŭcy źviartajuć uvahu, što vybuchovaje prystasavańnie (jano było ŭ zaplečniku, jaki Kryhieru zahadali pakłaści na rejki) spracavała nie na asnoŭnych čyhunačnych kalainach, a pamiž druhasnymi (№4 i №5), jakija vykarystoŭvajucca dla manieŭraŭ. U vyniku byli paškodžany dźvie špały i parušana hieamietryja rejki. Na adnaŭleńnie było zatračana dźvie hadziny. Košt skłaŭ 1639 rubloŭ 66 kapiejek.
Padryŭ adbyŭsia 5 kastryčnika 2023 hoda ŭ 23.22. Za paŭhadziny da i paŭhadziny paśla pa kalainach №4 i №5 nie płanavałasia ruchu. Da taho ž u hety pieryjad i nastupnyja dni nie byli zapłanavany nijakija vajskovyja pieravozki praz stancyju «Aziaryšča».
Miesca padryvu, adznačaje Biełpoł, dobra fiksujecca kamierami videanazirańnia čyhunačnaj stancyi. Dla praviadzieńnia teraktu možna było vybrać miesca za stancyjaj, jakoje nie prahladajecca kamierami i dzie ŭsiaho dva čyhunačnyja pałotny.
Takim čynam, vybuch pa svajoj mahutnaści i časie praviadzieńnia nijak nie moh pieraškodzić čyhunačnamu ruchu praz «Aziaryšča», nie havoračy pra mahčymaść pieraškodzić vajskovym pieravozkam ci pasažyrskim ciahnikam.
Jašče adzin važny momant, na jaki źviartaje ŭvahu Biełpoł, — u prapahandysckim filmie pra Kryhiera śćviardžajuć, što jon źbiraŭsia ŭstupić u zamiežny bataljon «Viestern» (adzinka ŭ składzie pałka Kastusia Kalinoŭskaha) nie paźniej za 20 vieraśnia 2023. Ale ab stvareńni bataljona było abvieščana tolki 25 vieraśnia.
U prapahandysckim filmie kazali, što niemiec u Asipovičach zdymaŭ vajskovuju techniku i terytoryju vajskovaj častki 97115.
Vyklikaje pytańnie i nieabchodnaść maršrutyzacyi Kryhiera Słužbaj biaśpieki Ukrainy (SBU). Usie abjekty, što jon fatahrafavaŭ, jość na huhł-kartach i aktualnych spadarožnikavych zdymkach, jakija dastupnyja SBU.
Biełpołaŭcy zaŭvažajuć, što Kryhier nie źjaŭlajecca śpiecyjalistam u vajskovych pytańniach i nie maje nijakich navykaŭ abychodžańnia z vybuchovymi prystasavańniami. Akramia hetaha, jak zamiežnik jon vydzialaŭsia siarod miascovaha nasielnictva, što stvarała dadatkovuju niebiaśpieku. Takija dziejańni sa značna mienšaj ryzykaj moh ździejśnić luby miascovy žychar.
Što nasamreč adbyłosia z Kryhieram?
Biełpołaŭcy pryvodziać svaju viersiju taho, što zdaryłasia z Rykam Kryhieram.
Žychar Hiermanii ŭ siłu asabistych abstavin vyrašyŭ źmianić svajo žyćcio i ŭstupić u jakoje-niebudź internacyjanalnaje padraździaleńnie Uzbrojenych sił Ukrainy.
Padčas pošukaŭ infarmacyi ŭ internecie ŭ vieraśni 2023 hoda jon natrapiŭ na padstaŭny akaŭnt, jaki byŭ pad kantrolem siłavikoŭ Biełarusi. Z Kryhieram pa videasuviazi razmaŭlaŭ nie supracoŭnik SBU «Mikałaj» a supracoŭnik biełaruskich śpiecsłužbaŭ.
Padstaŭny supracoŭnik pierakanaŭ Kryhiera pryjechać u Biełaruś dla «pravierki», nie raskryvajučy jaje padrabiaznaściej. Dla taho, kab paskoryć jaho pryjezd, a taksama kab paźbiehnuć trapleńnia ŭ pole zroku hiermanskich śpiecsłužbaŭ, Kryhier prylacieŭ u Biełaruś praz Azierbajdžan. Heta nie patrabavała najaŭnaści biełaruskaj vizy, bo pa prybyćci ŭ krainu praz aeraport dziejničaje biaźvizavy režym.
Mužčyna prylacieŭ u Biełaruś z kvadrakoptaram (bieśpiłotnikam) 2 kastryčnika 2023 hoda. A biełaruskaje zakanadaŭstva z 25 vieraśnia taho ž hoda zabaraniła ich uvoz na terytoryju Biełarusi fizičnymi asobami.
Kvadrakoptar «špijona» kaštuje kala 110 jeŭra, jaho batarei chapaje na 9-10 chvilin palotu, a dalnaść palotu — 40 mietraŭ. Taki bieśpiłotnik zusim nie hodny dla špijonskaj dziejnaści.
Biełpołaŭcy ŭpeŭnienyja, što apieracyja siłavikoŭ z Ryka Kryhieram — heta pravakacyja.
Zadańni pa fota— videazdymkach abjektaŭ u Asipovičach nieabchodny byli dla stvareńnia materyjalnych dokazaŭ «ahienturnaj dziejnaści ŭ intaresach SBU».
Biełpołaŭcy śćviardžajuć, što ŭ rukzaku, jaki zabraŭ Kryhier z tajnika i nie cikaviŭsia jaho źmieścivam, znachodziŭsia mulaž vybuchovaj pryłady. Paśla mužčyna atrymaŭ zadańnie pakłaści rukzak kala čyhunačnych šlachoŭ, zrabić fota i adpravić kurataru. Nijakich instrukcyj ab ustanoŭcy samarobnaha vybuchovaha prystasavańnia jamu nie davali.
Biełpoł ličyć, što padryŭ byŭ ździejśnieny samimi siłavikami. Dla kantrolu za situacyjaj u noč z 5 na 6 kastryčnika 2023 hoda niekatoryja supracoŭniki kiraŭnictva Biełaruskaj čyhunki znachodzilisia na pracoŭnych miescach, a na šerahu abjektaŭ čyhunki prysutničali aficery KDB. Mienavita pa ich ukazańni čyhunačnaje złučeńnie pa stancyi «Aziaryšča» paśla taho, jak adbyŭsia vybuch, nie pierakryvałasia.
Alaksandr Łukašenka pamiłavaŭ Ryka Kryhiera
Prapahanda pakazała film pra Kryhiera. Ź jaho vynikaje, što niemca moh razyhrać KDB, a pytańniaŭ bolej, čym adkazaŭ
«Raptam nie pryjšoŭ na pracu, a praz paru dzion jaho zatrymali». Novyja padrabiaznaści pra niemca, prysudžanaha da rasstrełu ŭ Biełarusi
Mahutnaść vybuchu na stancyi Aziaryšča davoli vysokaja, ale asablivych paškodžańniaŭ niama — Supolnaść čyhunačnikaŭ
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni14
Kamientary
Kali vy mianty sapraŭdnyja, to ad vas čakajuć vynikaŭ apieratyŭnaj pracy, pryciahnieńnia złačyncaŭ da adkaznaści, abarony intaresaŭ biełarusaŭ, a nie jucjubčyki pilić. Ci pa-za hrantami nie pracujem?