«Чарговы ўнучок дарваўся да спадчыны». Дабітую кватэру ў Мінску здаюць у арэнду за вялікія грошы
«Рэтра-аднушку» на Гамарніка ўласнік нават не прыбраў перад тым, як сфатаграфаваць. Затое цану паставіў немалую.
Тыктокер пад нікам minsk_kv падзяліўся фотаздымкамі арэнднай кватэры, якую знайшоў на «Куфары». «Чарговы ўнучок дарваўся да спадчыны», — падпісаў ён ролік.
«Рэтра-аднушкай» кватэру называлі самыя тактоўныя з каментатараў. Бо насамрэч яе сцены даўно не бачылі рамонту, а савецкая мэбля, здаецца, вось-вось разваліцца на часткі. Адмысловы шарм апартаментам дадаюць гаспадарскія рэчы, раскіданыя паўсюль, а таксама вельмі брудны ўнітаз.
Очередной внучок дорвался до наследства
Уласнік планаваў здаваць такую кватэру ў арэнду за 1000 рублёў (каля 320 даляраў) на месяц.
Прапанова так абурыла блогера, што ён пацікавіўся ў арэндадаўцы: «Гэта вы будзеце плаціць 1000 рублёў, каб тут жылі людзі?»
Як аўтар роліку потым удакладніў у каментарыях, адказ на пытанне ён не атрымаў. Уласнік кватэры ў хуткім часе выдаліў сваю аб'яву — ці знайшоў непераборлівага арандатара з грашыма, ці рашыў спачатку зрабіць рамонт (ці хаця б прыбрацца).
Відэа набрала каля 385 тысяч праглядаў і 11 тысяч лайкаў. Каментатары жартавалі, што ўласнік забыў пазначыць у апісанні, што не пусціць у свой палац людзей з дзецьмі ці хатнімі гадаванцамі. «Што вам не падабаецца? Вінтаж жа», — напісаў яшчэ адзін карыстальнік тыктоку.
Нехта падзяліўся сваім болем: «Цяпер з бацькамі шукаем мне кватэру на час вучобы. Дык цэны цяпер ад 300 даляраў з жудасным рамонтам, часцяком наогул пустыя, і плюс у раёне без метро», «І за такую цану менавіта такія кватэры. Хочаш нармальна — будзе ў 2 разы даражэй».
Былі і тыя, хто заступіўся за ўласніка і напісаў, што той мае права здаваць нерухомасць за той кошт, які хоча, а незадаволеным трэба ці шукаць іншы варыянт, ці набыць сваю кватэру.
«Я б лепш спытаў, на што разлічваюць людзі, якія прыязджаюць у Мінск: вы хочаце за 350 даляраў кватэру з нармальным дызайнам? Можа, яшчэ і трохпакаёўку? Толькі нармальныя аднапакаёўкі за такія грошы, астатняе даражэйшае на парадак», — абурыўся адзін з каментатараў.
З’явіліся і прапановы скласці петыцыю, каб кошт арэнды жылля пачалі рэгуляваць, як цэны на некаторыя тавары ў крамах.
Цяпер чытаюць
Пра што маўчыць Аляксей Францкевіч, якому Польшча закрыла ўезд на 10 гадоў55
Каментары