Купля аўто з Кітая на замову — рэальная магчымасць зэканоміць або пустая трата часу?
Пасля таго як перагон у Беларусь аўто з Еўропы і ЗША ўскладніўся праз шматлікая абмежаванні, некаторыя гульцы рынку пашырылі геаграфію закупак і пачалі прапаноўваць набываць на замову аўтамабілі з Кітая. Пацікавіліся, як адбываецца гэты працэс.
Кампаній, якія аказваюць паслугі па куплі аўто з Кітая, хапае. Часцей за ўсё гэта тыя самыя фірмы-пасярэднікі, якія раней дапамагалі купляць на замову машыны з Еўропы або ЗША.
Колькі каштуе?
Цэны на пасярэдніцкія паслугі па куплі аўто з Кітая вагаюцца ад 700 да 2000 рублёў.
Але арыентавацца варта не на кошт паслугі, а на фінальную суму, у якую абыходзіцца абраны вамі аўтамабіль. Выніковы кошт таго самага аўто, набытага праз пасрэдніка, які ацэньвае свае паслугі ў 700 рублёў, лёгка можа аказацца большым, чым у кампаніі, якая возьме 2000 рублёў.
І калі з машынамі, якія прадаюцца ў Еўропе ці ЗША, папрасіць зрабіць дакладны разлік не складае праблем, то з Кітаем такое можа не спрацаваць. Кітайскіх сайтаў, кшталту Mobile.de, на якіх можна адшукаць аўто і на канкрэтным прыкладзе папрасіць зрабіць папярэднюю калькуляцыю, няма. Ці прынамсі беларускія кампаніі імі не дзеляцца, бо менеджары дасылаюць толькі фоты аўто з апісаннем і выніковым коштам у Мінску.
З якіх этапаў складаецца купля аўто?
Першае, што трэба зрабіць, — вызначыцца з пасрэднікам, заключыць з ім дамову (часцей за ўсё «на аказанне інфармацыйных паслуг»). У залежнасці ад кампаніі для куплі аўто ў Кітаі трэба пакінуць дэпазіт, які гарантуе, што вы настроены сур'ёзна і пасля выбару аўто дакладна разлічыцеся за яго.
Сума дэпазіту можа быць розная — ад 480 да 1000 даляраў, або 10% ад кошту аўто.
Пасля таго, як кліент вызначыцца з выбарам, на яго імя рыхтуюць інвойс. Аплату за аўто пераводзяць непасрэдна на рахунак кітайскай фірмы, з якой супрацоўнічае беларускі пасрэднік. Па словах кансультантаў, з Беларусі ў Кітай перавод ідзе ад трох дзён да тыдня.
За дастаўку таксама трэба аплачваць праз перавод. Дастаўка аўто каштуе 2500-3000 даляраў. Возяць машыны з Кітая ў Беларусь цяпер часцей за ўсё аўтавозамі.
Што па тэрмінах?
Як і з цэнамі на паслугі, заяўленыя ў рэкламе тэрміны дастаўкі аўто ў розных фірм адрозніваюцца. Самыя хуткія пасрэднікі ў рэкламе называюць тэрміны 3-4 тыдні. Але з аповедаў людзей, якія ўжо сутыкаліся з купляй аўто з Кітая на замову, раней за паўтара месяца нікому машыну не дастаўлялі. Большасць пасрэднікаў называе тэрмін 1,5-2 месяцы, але ў прыватных размовах прызнаюцца, што лепей закладаць на ўсё пра ўсё месяцы тры ад таго моманту, як вы заплацілі за аўто праз беларускі банк.
Якія аўто выгадна везці з Кітая?
Натуральна, што з Кітая выгадна прывозіць машыны кітайскай вытворчасці. Прычым гэта не абавязкова мусіць быць аўтамабіль мясцовага брэнду. У Кітаі таксама вырабляюць Tesla, некаторыя мадэлі BMW, Mercedes-Benz і іншых сусветных вытворцаў. Большасць з такіх аўто складаюць электрамабілі.
З Кітая ў Беларусь у асноўным вязуць новыя электрамабілі кітайскіх брэндаў, але сустракаюцца і бэушныя машыны, у тым ліку з традыцыйнымі рухавікамі.
Прычым падобным чынам да нас трапляюць і аўтамабілі маркі Geely. Вязуць як мадэлі, якія афіцыйна прадаюцца на нашым рынку (хоць і пад іншымі назвамі), так і тыя, што ёсць толькі на кітайскім.
Але за эканомію ў некалькі тысяч даляраў, якая мусіць атрымацца пры куплі аўто на замову, давядзецца плаціць. Нават новыя машыны, якія вы такім чынам купіце ў Кітаі, губляюць гарантыю.
То-бок атрымліваецца, што ўмоўны Geely з Кітая можа абысціся крыху танней за машыну беларускай вытворчасці, але гарантыі на такое аўто няма.
Ці карыстаецца кітайскі кірунак вялікім попытам?
Выглядае, што не вельмі. Машын, прывезеных з Кітая фізічнымі асобамі, не шмат. Асабліва, калі параўноўваць іх колькасць з імпартам з Еўрасаюза і ЗША.
Менеджары некаторых кампаній падчас кансультацый пацвярджаюць, што Кітай займае не больш за 5-10% ад агульнага аб'ёму замоў. Маўляў, набываць бітыя аўто са Штатаў пры падобных тэрмінах дастаўкі ўсё адно выгадней, дый камплектацыя ў машынах з Амерыкі, як правіла, лепшая, чым у аналагічных аўто з Кітая.
Падобна, што адсутнасць гарантыі і працяглы час чакання не вельмі прывабліваюць пакупнікоў аўто з Кітая на замову.
Паралельна з гэтым у Беларусі продажы новых аўто кітайскіх брэндаў растуць. На рынак прыходзяць новыя брэнды. Але ў выпадку куплі ў дылера чакаць не трэба, аўтамабіль можна «памацаць», ды і гарантыя нікуды не знікае.
Каментары