60-гадовага псіхолага з вялікім стажам судзяць за «садзейнічанне экстрэмізму»
Наталля Верабей — дасведчаны псіхолаг і мае найвышэйшую катэгорыю. Хутчэй за ўсё, яе затрымалі за дапамогу палітвязням.
Наталлі Верабей 60 гадоў. Яна выпусцілася з біялагічнага факультэта БДУ ў 1987 годзе. Невядома, як яна пасля прыйшла ў псіхалогію.
У прафесіі яна як мінімум з нулявых, пра гэта можна адшукаць звесткі ў інтэрнэце. У сацыяльна-педагагічным цэнтры Савецкага раёна Мінска Наталля Верабей працуе найменш з 2011 года. Невядома, ці звольнілі яе праз крыміналку — на сайце сацыяльна-педагагічнага цэнтра яна дагэтуль лічыцца сярод работнікаў і нават дзеячоў прафсаюза.
Наталля Верабей працавала з рознымі катэгорыямі людзей. Вядома, напрыклад, што яна займалася псіхалагічнай падрыхтоўкай алімпіяднікаў, дзецьмі з ДЦП, псіхічнымі і псіхалагічнымі праблемамі, а таксама вучыла школьных педагогаў і педагогаў-псіхолагаў. Таксама займалася жаночай псіхалогіяй, пісала артыкулы на тэму.
Невядома, калі Наталлю затрымалі, але апошняя навіна пра яе выйшла напрыканцы 2023 года, хоць раней пра яе рэгулярна пісалі афіцыйныя каналы — напрыклад, канал адукацыі Савецкага раёна. Таксама адметна, што яе судзяць у той жа час, што і людзей, якіх затрымалі за дапамогу палітвязням. Але сутнасць абвінавачання дакладна невядомая.
Суд над Наталляй пачнецца 1 кастрычніка 2024 года. Яе абвінавачваюць у «садзейнічанні экстрэмісцкай дзейнасці» (ч. 1 і ч. 2 арт. 361-4 КК). Ёй пагражае да сямі гадоў калоніі. Невядома, ці жанчына за кратамі або яе пакінулі пад падпіскай.
Судзіць яе будзе Святлана Макарэвіч. Раней яна кіравала Кастрычніцкім судом Мінска, дзе таксама выносіла палітычныя прысуды, а цяпер яе перавялі ў Мінскі гарадскі суд. За год на пасадзе яна разглядзела больш за 30 палітычных крымінальных справаў уключна з апеляцыямі.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Я больш не анархіст». Мікола Дзядок — пра турму, Бога і расчараванне ў ідэалогіях12
Каментары