60-hadovaha psichołaha ź vialikim stažam sudziać za «sadziejničańnie ekstremizmu»
Natalla Vierabiej — daśviedčany psichołah i maje najvyšejšuju katehoryju. Chutčej za ŭsio, jaje zatrymali za dapamohu palitviaźniam.
Natalli Vierabiej 60 hadoŭ. Jana vypuściłasia ź bijałahičnaha fakulteta BDU ŭ 1987 hodzie. Nieviadoma, jak jana paśla pryjšła ŭ psichałohiju.
U prafiesii jana jak minimum z nulavych, pra heta možna adšukać źviestki ŭ internecie. U sacyjalna-piedahahičnym centry Savieckaha rajona Minska Natalla Vierabiej pracuje najmienš z 2011 hoda. Nieviadoma, ci zvolnili jaje praz kryminałku — na sajcie sacyjalna-piedahahičnaha centra jana dahetul ličycca siarod rabotnikaŭ i navat dziejačoŭ prafsajuza.
Natalla Vierabiej pracavała z roznymi katehoryjami ludziej. Viadoma, naprykład, što jana zajmałasia psichałahičnaj padrychtoŭkaj alimpijadnikaŭ, dziećmi z DCP, psichičnymi i psichałahičnymi prablemami, a taksama vučyła školnych piedahohaŭ i piedahohaŭ-psichołahaŭ. Taksama zajmałasia žanočaj psichałohijaj, pisała artykuły na temu.
Nieviadoma, kali Natallu zatrymali, ale apošniaja navina pra jaje vyjšła naprykancy 2023 hoda, choć raniej pra jaje rehularna pisali aficyjnyja kanały — naprykład, kanał adukacyi Savieckaha rajona. Taksama admietna, što jaje sudziać u toj ža čas, što i ludziej, jakich zatrymali za dapamohu palitviaźniam. Ale sutnaść abvinavačańnia dakładna nieviadomaja.
Sud nad Natallaj pačniecca 1 kastryčnika 2024 hoda. Jaje abvinavačvajuć u «sadziejničańni ekstremisckaj dziejnaści» (č. 1 i č. 2 art. 361-4 KK). Joj pahražaje da siami hadoŭ kałonii. Nieviadoma, ci žančyna za kratami abo jaje pakinuli pad padpiskaj.
Sudzić jaje budzie Śviatłana Makarevič. Raniej jana kiravała Kastryčnickim sudom Minska, dzie taksama vynosiła palityčnyja prysudy, a ciapier jaje pieraviali ŭ Minski haradski sud. Za hod na pasadzie jana razhladzieła bolš za 30 palityčnych kryminalnych spravaŭ uklučna z apielacyjami.
«Naša Niva» — bastyjon biełaruščyny
PADTRYMAĆEks-kandydatku ŭ prezidenty Taćcianu Karatkievič pasadzili na 15 sutak11
Kamientary