У параўнанні з 2021 годам колькасць працуючых знізілася больш чым на 24 тысячы чалавек. Пры гэтым назіраецца рост вытворчасці сельскагаспадарчай прадукцыі.
На новыя лічбы сярэднеспісачнай колькасці работнікаў у сельскай гаспадарцы Беларусі звярнула ўвагу «Сельская газета». За першае паўгоддзе гэтага года лічба склала 221,6 тысячы чалавек. У 2021 годзе іх было 245,9 тысячы.
Атрымліваецца, што за тры гады сельская гаспадарка страціла амаль кожнага дзясятага работніка. Калі ж параўнаць з сітуацыяй перад распадам СССР, то скарачэнне працуючых адбылося амаль у пяць разоў.
Пры гэтым, як піша выданне, за прыкладна тры с паловай дзесяцігоддзі значна павялічылася вытворчасць сельскагаспадарчай прадукцыі.
Найбольш заўважна вырасла вытворчасць малака. Калі ў 1990 годзе ад 1,7 мільёна кароў было надоена 5,6 мільёна тон малака, то ў 2024 годзе маюць атрымаць звыш 8,7 мільёна тон ад пагалоўя ў 1,4 мільёна. Пры росце надояў назіраецца пастаяннае скарачэнне колькасці даярак. Калі пяць гадоў таму іх было 23 тысячы, то цяпер на 5 тысяч менш: іх замяняе лепшая механізацыя.
Цікава таксама паглядзець, як змянілася ўраджайнасць асобных сельскагаспадарчых культур у параўнанні з 1990-м годам. Апошнія статыстычныя лічбы ёсць за 2022 год.
За больш чым тры дзесяцігоддзі гэты паказчык у зерневых узрос усяго на чвэрць — з 27,2 да 34,5 цэнтнера на гектар. У той жа час у бульбы за гэты ж перыяд ураджайнасць узрасла больш як на 60% (з 138 да 223 ц на гектар), ураджайнасць гародніны амаль на 60% (з 188 да 295 ц на гектар), цукровых буракоў — амаль на 50%.
Рэкардсменамі па росту ўраджайнасці стала льновалакно. Яно прыбавіла больш чым удвая (з 4,6 да 10,7 тон на гектар).
А вось з кукурузай назіралася адваротная тэндэнцыя. Яе ўраджайнасць з 237 тон з гектару ў 1990-м знізілася да 212 тон з гектару ў 2022-м, той год аказаўся няўдалы. Рэкордная ўраджайнасць — 320 тон з гектара — была ў 2011 годзе.
Што яшчэ прыкметна — за тры дзесяцігоддзі ў Беларусі амаль у чатыры разы ўзрасла ўраджайнасць пладоў і ягад (з 31,9 да 120,4 тоны з гектара).
Мы паглядзелі, як змянілася структура вытворчасці асноўнай сельскагаспадарчай прадукцыі на душу насельніцтва з 1990-га года па 2022-гі.
Так, калі ў 1990-м на душу насельніцтва прыходзілася 690 кілаграмаў зерня, то ў 2022-м — 943 (рост амаль на 37%), вытворчасць гародніны вырасла больш чым у чатыры разы (з 73 да 310 кілаграмаў), пладоў і ягад — больш чым у два з паловай разы (з 35 да 89).
Значна менш істотным быў рост вытворчасці мяса — на 16 кілаграмаў (з 116 да 132), малака — на 121 кілаграм (з 732 да 853), яек — на 16 штук (з 359 да 375).
А вось з вытворчасцю бульбы ў краіне адбылося скарачэнне амаль у два разы — з 843 да 418 кілаграмаў на душу насельніцтва. Аб прычынах мы пісалі раней.
Рост прадукцыйнасці працы ўласцівы не толькі Беларусі: тое самае здарылася і ва Украіне, Літве, Польшчы. Усё дзякуючы механізацыі і лепшай лагістыцы.
Каментары