Беларуска ўпершыню паедзе на конкурс прыгажосці «Міс Сусвет». Але не тая, якая перамагла ў нацыянальным адборы
Сёлета Беларусь упершыню будзе ўдзельнічаць у «Міс Сусвет» — адным з самых прэстыжных конкурсаў прыгажосці. Але сітуацыя атрымліваецца дзіўная: тытул «Міс Сусвет Беларусь» далі Карыне Кісялёвай, а на конкурс паедзе Элеанора Качалоўская («Міс Беларусь 2023»).
У нацыянальным этапе конкурсу «Міс Сусвет» у Беларусі перамагла Карына Кісялёва. СМІ пісалі, што дзяўчына родам з Беларусі, але жыве на дзве сталіцы — Мінск і Маскву. Дарэчы, у Расіі яна скончыла Маскоўскі авіяцыйны інстытут па спецыяльнасці піяр і сувязі з грамадскасцю. Актыўна ўдзельнічае ў розных міжнародных конкурсах прыгажосці — была на «Міс Эка Інтэрнэшнл», «Міс Зямля» і іншых.
Яшчэ 21 верасня Карына паказвала ў сваім інстаграме, як з іншымі дзяўчатамі-канкурсанткамі наведвала Чэрвеньскі сацыяльны пансіянат «Свет дабрыні». А 28 верасня дзяўчына не без гонару напісала, што стане першаадкрывальніцай «Міс Сусвет» для Беларусі. Але цяпер той допіс выдалены з інстаграму. Карына пакінула толькі фота, зробленае перад пачаткам фіналу. Англамоўныя падпісчыкі цікавяцца, што здарылася і чаму Карына не ляціць у Мехіка, дзе пройдзе фінал міжнароднага конкурсу.
Дзіўна, але ў інстаграм-акаўнце miss_universe_belarus няма ніводнага здымка з нацыянальнага этапу «Міс Сусвет». Затое ёсць відэа, у якім Элеанора Качалоўская заварочваецца ў чырвона-зялёны сцяг. Мадэль называюць афіцыйнай прадстаўніцай Беларусі на конкурсе «Міс Сусвет».
Гэты акаўнт — перайменаваны акаўнт конкурсу «Міс Беларусь», у якім у 2023 годзе перамагла Элеанора Качалоўская. Беларускі акаўнт «Міс Сусвет», які адзначала ў сваіх допісах Карына Кісялёва падчас удзелу ў нацыянальным адборы, цяпер выдалены.
Ці ўдзельнічала Элеанора Качалоўская ў «Міс Сусвет Беларусь», незразумела. На агульным фота фіналістак са стужкамі пераможцаў яе няма.
На афіцыйным сайце «Міс Сусвет» пачалося галасаванне. Аднак удзел у ім не бясплатны. Першапачаткова трэба набыць галасы: ад трох галасоў за 1 даляр да 450 за амаль што сотню даляраў. Качалоўская ўжо просіць падпісчыкаў падтрымаць яе.
У 2024 годзе прыгажуні з розных краін прыедуць на конкурс «Міс Сусвет» у сталіцу Мексікі. Фінал запланаваны на 16 лістапада. Колькасць паўфіналістак конкурсу павялічана да трыццаці, што стане самым высокім паказчыкам у гісторыі конкурсу. Разам з Беларуссю на конкурсе дэбютуюць Эрытрэя, Гвінея, Іран, Макао, Малдова, Паўночная Македонія, Аб'яднаныя Арабскія Эміраты, Самалі і Узбекістан.
Для таго, каб прадстаўніца краіны мела права ўдзельнічаць у конкурсе, патрэбна мясцовая кампанія або прыватная асоба, якая аплаціць франшызны ўзнос.
Летась «Міс Сусвет» стала Шэйніс Паласіёс з Нікарагуа. Менавіта яна будзе ўручаць карону пераможцы.
Конкурс «Міс Сусвет» быў заснаваны ў 1952 годзе каліфарнійскай кампаніяй па вытворчасці адзення і купальнікаў і з таго часу мае штаб-кватэру ў Злучаных Штатах. З 1996 па 2015 год конкурс прыгажосці належаў Дональду Трампу. Цяпер уладальніцай конкурсу з’яўляецца Джакапхонг Джакраджутатып — трансгендарная жанчына.
Дарэчы, з 2012 года адкрытым трансгендарным жанчынам дазволена ўдзельнічаць у «Міс Сусвет» пры ўмове, што яны выйгралі свае нацыянальныя конкурсы.
Міс Беларусь Элеанора Качалоўская хваліцца адпачынкам у акупаваным Крыме ФОТЫ
«Міс Беларусь» Элеанора Качалоўская ажыццявіла даўнюю мару, з'ездзіўшы ў Бранск на канцэрт «Любэ»
Дзе тусіць лукашэнкаўская моладзь? П’е ў «Лебядзіным», адпачывае ў Парыжы і Мілане
Галоўнае — каб у фільма быў хэпі-энд. БРСМ звадзіў «Міс Беларусь» на прэм'еру прапагандысцкай карціны
«Яна не выглядала шчырай, была ў масцы». Паўлючэнка пра сустрэчу Калеснікавай з беларускімі журналістамі12
Каментары