Biełaruska ŭpieršyniu pajedzie na konkurs pryhažości «Mis Suśviet». Ale nie taja, jakaja pieramahła ŭ nacyjanalnym adbory
Sioleta Biełaruś upieršyniu budzie ŭdzielničać u «Mis Suśviet» — adnym z samych prestyžnych konkursaŭ pryhažości. Ale situacyja atrymlivajecca dziŭnaja: tytuł «Mis Suśviet Biełaruś» dali Karynie Kisialovaj, a na konkurs pajedzie Eleanora Kačałoŭskaja («Mis Biełaruś 2023»).
U nacyjanalnym etapie konkursu «Mis Suśviet» u Biełarusi pieramahła Karyna Kisialova. ŚMI pisali, što dziaŭčyna rodam ź Biełarusi, ale žyvie na dźvie stalicy — Minsk i Maskvu. Darečy, u Rasii jana skončyła Maskoŭski avijacyjny instytut pa śpiecyjalnaści pijar i suviazi z hramadskaściu. Aktyŭna ŭdzielničaje ŭ roznych mižnarodnych konkursach pryhažości — była na «Mis Eka Internešnł», «Mis Ziamla» i inšych.
Jašče 21 vieraśnia Karyna pakazvała ŭ svaim instahramie, jak ź inšymi dziaŭčatami-kankursantkami naviedvała Červieński sacyjalny pansijanat «Śviet dabryni». A 28 vieraśnia dziaŭčyna nie biez honaru napisała, što stanie pieršaadkryvalnicaj «Mis Suśviet» dla Biełarusi. Ale ciapier toj dopis vydaleny ź instahramu. Karyna pakinuła tolki fota, zroblenaje pierad pačatkam finału. Anhłamoŭnyja padpisčyki cikaviacca, što zdaryłasia i čamu Karyna nie lacić u Miechika, dzie projdzie finał mižnarodnaha konkursu.
Dziŭna, ale ŭ instahram-akaŭncie miss_universe_belarus niama nivodnaha zdymka z nacyjanalnaha etapu «Mis Suśviet». Zatoje jość videa, u jakim Eleanora Kačałoŭskaja zavaročvajecca ŭ čyrvona-zialony ściah. Madel nazyvajuć aficyjnaj pradstaŭnicaj Biełarusi na konkursie «Mis Suśviet».
Hety akaŭnt — pierajmienavany akaŭnt konkursu «Mis Biełaruś», u jakim u 2023 hodzie pieramahła Eleanora Kačałoŭskaja. Biełaruski akaŭnt «Mis Suśviet», jaki adznačała ŭ svaich dopisach Karyna Kisialova padčas udziełu ŭ nacyjanalnym adbory, ciapier vydaleny.
Ci ŭdzielničała Eleanora Kačałoŭskaja ŭ «Mis Suśviet Biełaruś», niezrazumieła. Na ahulnym fota finalistak sa stužkami pieramožcaŭ jaje niama.
Na aficyjnym sajcie «Mis Suśviet» pačałosia hałasavańnie. Adnak udzieł u im nie biaspłatny. Pieršapačatkova treba nabyć hałasy: ad troch hałasoŭ za 1 dalar da 450 za amal što sotniu dalaraŭ. Kačałoŭskaja ŭžo prosić padpisčykaŭ padtrymać jaje.
U 2024 hodzie pryhažuni z roznych krain pryjeduć na konkurs «Mis Suśviet» u stalicu Mieksiki. Finał zapłanavany na 16 listapada. Kolkaść paŭfinalistak konkursu pavialičana da tryccaci, što stanie samym vysokim pakazčykam u historyi konkursu. Razam ź Biełaruśsiu na konkursie debiutujuć Erytreja, Hvinieja, Iran, Makao, Małdova, Paŭnočnaja Makiedonija, Abjadnanyja Arabskija Emiraty, Samali i Uźbiekistan.
Dla taho, kab pradstaŭnica krainy mieła prava ŭdzielničać u konkursie, patrebna miascovaja kampanija abo pryvatnaja asoba, jakaja apłacić franšyzny ŭznos.
Letaś «Mis Suśviet» stała Šejnis Pałasijos ź Nikarahua. Mienavita jana budzie ŭručać karonu pieramožcy.
Konkurs «Mis Suśviet» byŭ zasnavany ŭ 1952 hodzie kalifarnijskaj kampanijaj pa vytvorčaści adzieńnia i kupalnikaŭ i z taho času maje štab-kvateru ŭ Złučanych Štatach. Z 1996 pa 2015 hod konkurs pryhažości naležaŭ Donaldu Trampu. Ciapier uładalnicaj konkursu źjaŭlajecca Džakapchonh Džakradžutatyp — transhiendarnaja žančyna.
Darečy, z 2012 hoda adkrytym transhiendarnym žančynam dazvolena ŭdzielničać u «Mis Suśviet» pry ŭmovie, što jany vyjhrali svaje nacyjanalnyja konkursy.
Mis Biełaruś Eleanora Kačałoŭskaja chvalicca adpačynkam u akupavanym Krymie FOTY
«Mis Biełaruś» Eleanora Kačałoŭskaja ažyćciaviła daŭniuju maru, źjeździŭšy ŭ Bransk na kancert «Lube»
Dzie tusić łukašenkaŭskaja moładź? Pje ŭ «Lebiadzinym», adpačyvaje ŭ Paryžy i Miłanie
Hałoŭnaje — kab u filma byŭ chepi-end. BRSM zvadziŭ «Mis Biełaruś» na premjeru prapahandysckaj karciny
Kamientary