«Мая каманда рыхтавалася да прэзідэнцкай гонкі». Чэрачань шкадуе, што не зможа стаць кандыдатам у 2025 годзе
Экс-кандыдат у прэзідэнты ў 2020 годзе, бізнэсмен Сяргей Чэрачань збіраўся і ў 2025 годзе прымаць удзел у прэзідэнцкай гонцы, але не зможа з-за новага ўзроставага цэнзу.
Паводле слоў Чэрачня, для яго і яго каманды прызначаная дата выбараў сталася нечаканасцю і расчараваннем, піша «Спутнік».
«Я збіраўся прымаць удзел і ў гэтых прэзідэнцкіх выбарах, мая каманда рыхтавалася да прэзідэнцкай гонкі. Але, на жаль, праз тое, што выбары прызначаны на 26 студзеня 2025 года, я не змагу прыняць у іх удзел. Мне не споўніцца яшчэ 40» гадоў», — распавёў Сяргей Чэрачань.
«Мне 40 гадоў споўніцца 8 мая. Мы разлічвалі, што выбары назначаць на лета 2025 года», — сказаў ён.
Пры гэтым Чэрачань паведаміў, што ў абавязковым парадку будзе прымаць удзел у прэзідэнцкіх выбарах у 2030 годзе.
«Да выбараў 2025 года я пачаў рыхтавацца адразу пасля прэзідэнцкай кампаніі 2020 года. У 2030 годзе мы абавязкова будзем удзельнічаць у барацьбе за пасаду прэзідэнта», — сказаў ён.
Чэрачань таксама паведаміў, што не будзе ні з кім з кандыдатаў у прэзідэнты ў 2025 годзе дзяліцца галасамі сваіх прыхільнікаў.
На выбарах 2020 года Сяргей Чэрачань, паводле звестак ЦВК, набраў 1,14%. У Ганны Канапацкай, паводле афіцыйных звестак, было 1,68%, у Андрэя Дзмітрыева — 1,21%. Святлане Ціханоўскай ЦВК тады напісала 10,14%, хоць, паводле вынікаў платформы «Голас» і незалежных экзіт-полаў, тая перамагла. Фальсіфікацыя вынікаў выбараў выклікала масавыя пратэсты ў краіне.
Лукашэнка нервова пракаментаваў візіт Ціханоўскай у Кіеў45
Каментары