У Германіі вызначылі моладзевае слова года. Гэта старажытны тэрмін, але з новым сэнсавым напаўненнем
За выбар слова адказвала выдавецкая кампанія Langenscheidt, стваральніца слоўнікаў нямецкай мовы, якая зладзіла галасаванне сярод прадстаўнікоў моладзі па ўсёй Германіі.
Нямецкая моладзь у якасці свайго слова года абрала англійскі тэрмін «аура», які, паводле Оксфардскага слоўніка, азначае «асаблівую атмасферу альбо якасць, якую стварае чалавек ці прадмет».
Пакаленне Z і пакаленне Альфа ў Германіі дадалі да тэрміну новы сэнс, каб апісваць чалавека, які зрабіў нешта добрае. Прасцей кажучы, гэта крутасць, якая ўзнікае ў выніку добрага ўчынку і можа быць выражаная, як цяпер папулярна ў нямецкай моладзі, у «ачках ауры», перадае агенцтва Euronews.
Само слова «аура» ўзнікла яшчэ ў антычнай Грэцыі і Рыме, дзе яно выкарыстоўвалася для абазначэння «лёгкага ветру» або «плыні паветра». Слова aura на старажытнагрэцкай (αὔρα) азначала не столькі нейкае містычнае або духоўнае паняцце, колькі фізічны феномен, звязаны з прыродай або дыханнем, які ствараў атмасферу або настрой у паэтычных і міфалагічных апісаннях. У такім жа сэнсе слова перайшло і ў лацінскую мову падчас Рымскай імперыі.
У сучасным сэнсе, як нябачнае энергетычнае поле вакол чалавека, слова «аура» пачало выкарыстоўвацца толькі ў XIX стагоддзі, асабліва ў кантэксце эзатэрычных і духоўных практык, калі многія філосафы і даследчыкі (пераважна брытанскія) спрабавалі выявіць або апісаць невядомыя энергіі, якія нібыта выпраменьваюць жывыя істоты.
Конкурс на вызначэнне моладзевага слова года, як піша Euronews, праводзіцца ў Германіі з 2008 года, але толькі чатыры гады таму права галасаваць перадалі непасрэдна нямецкай моладзі. Да гэтага галасаваць мог любы ахвотны. У 2020 годзе галасаванне стала даступным выключна для моладзі ва ўзросце ад 11 да 20 гадоў, каб абраныя словы сапраўды адлюстроўвалі моўную культуру маладых людзей.
Сёлета было зарэгістравана каля 100 000 галасоў — рэкорд за ўсю гісторыю конкурсу. У мінулыя гады нямецкая моладзь абірала такія словы, як goofy (2023 год, мілае слова для апісання чалавека, які выглядае эксцэнтрычным або няўклюдным), smash (2022 год, азначае «падчапіць» альбо заняцца сэксам з кімсьці; слова паходзіць ад гульні для знаёмстваў Smash or Pass), cringe (2021 год, апісанне чагосьці або кагосьці, хто выклікае сорам) і lost (2020 год, слэнг азначае недахоп асэнсаванасці або перспектывы ў жыцці).
Каментары