Новы кампактны апрасняльнік не дасць загінуць ад смагі ў моры
Апынуцца ў адкрытым моры без пітной вады — сцэнар, які для многіх становіцца сінонімам смяротнай небяспекі. Аднак у Вялікабрытаніі знайшлі рашэнне, якое дае значную колькасць чыстай вады і зусім не патрабуе электраэнергіі.
Гіпатэтычная перспектыва памерці ад смагі ў адкрытым моры выглядае жахліва і парадаксальна, асабліва калі вакол — толькі адна вада. Брытанскі стартап Hydro Wind Energy заняўся вырашэннем гэтай праблемы і прадставіў узор новага партатыўнага апрасняльніка QuenchSea 3.0, які ператварае салёную марскую ваду ў чыстую і цалкам бяспечную для піцця, паведамляе партал New Atlas.
Асноўны прынцып працы прыбора такі — карыстальнік рукой прыводзіць у рух рычаг, які прапускае марскую ваду праз трохузроўневую сістэму фільтрацыі і тым самым выдаляе соль, вірусы, бактэрыі, часцінкі мікрапластыку і іншыя забруджанні. Вада для ачысткі паступае праз сілавы шланг, а ачышчаная ўжо выходзіць у кантэйнер.
QuenchSea 3.0 можа даваць за гадзіну адразу 6—8 літраў пітной вады, якая адпавядае стандартам Сусветнай арганізацыі аховы здароўя (СААЗ), што робіць апрасненне хутчэйшым і менш стамляльным для карыстальніка, адзначае New Atlas.
Галоўная перавага новага апрасняльніка — яго незалежнасць ад знешніх крыніц энергіі і праца выключна на цяглічнай цязе. Прыбор можна браць з сабой у лодкі, на кемпінгі ці нават выкарыстоўваць у зонах, дзе няма доступу да чыстай вады. Такія рашэнні асабліва важныя ў кантэксце кліматычных зменаў, якія ўжо цяпер прыводзяць да недахопу пітной вады ў розных частках свету.
Як і любая тэхніка, QuenchSea 3.0 патрабуе рэгулярнага абслугоўвання. Мембрана зваротнага осмасу ў прыладзе (вельмі тонкі фільтр, які затрымлівае соль, вірусы, бактэрыі і іншыя дробныя забруджанні, дазваляючы праходзіць толькі чыстай вадзе) і картрыджы для астатніх звычайных фільтраў разлічаныя на ачыстку прыкладна 300 літраў вады (у залежнасці ад яе салёнасці і тэмпературы), пасля чаго іх трэба мяняць.
QuenchSea 3.0 цяпер знаходзіцца на стадыі распрацоўкі на краўдфандынгавай платформе Kickstarter. Як заяўляюць стваральнікі, кожны, хто зробіць унёсак у памеры 250 даляраў, атрымае па адной прыладзе, калі яны выйдуць на рынак.
Плануецца, што рознічная цана аднаго апрасняльніка складзе 500 даляраў, у той час як мембраны зваротнага осмасу будуць прадавацца па 30 даляраў за пару, а фільтры — па 20 даляраў за пару.
Цяпер чытаюць
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»26
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»
Учора — у лукашэнкаўскай турме, сёння — у Кіеве дапамагае ўкраінцам выжыць. Былы палітвязень і сваяк Ціханоўскай стаў валанцёрам у Пункце нязломнасці66
Учора — у лукашэнкаўскай турме, сёння — у Кіеве дапамагае ўкраінцам выжыць. Былы палітвязень і сваяк Ціханоўскай стаў валанцёрам у Пункце нязломнасці6
Хочаце жыць доўга — шукайце раён з нармальнымі дрэвамі. Навукоўцы высветлілі, што дрэвы ратуюць ад інфарктаў, а газоны могуць нават нашкодзіць здароўю44
Каментары