«Я страшэнна злая». Маладая маці ў шоку ад інфраструктуры ў «Мінск-Свеце»
Жанчына, якая жыве ў «Мінск-Свеце», паскардзілася на даступнасць асяроддзя ў раёне для маладых маці з вазкамі.
Дзяўчына звяртае ўвагу, што ў раёне набудавалі падземных пераходаў, у якіх маюцца спускавыя ліфты, але каб дабрацца ў тую ж паліклініку, ёй прыходзіцца мінуць чатыры такія пераходы.
«Па выніку я спусцілася ў гэты падземны пераход, а падняцца ўжо не магу, бо з чатырох ліфтаў працуе толькі адзін і на спуск. А пераход знаходзіцца досыць нізка, і падымаць вазок трэба вельмі высока ў горку, куды не змяшчаюцца колы. Таму мне прыходзіцца рабіць велізарнае кола вакол, каб дайсці да паліклінікі», — абураецца маладая маці.
Пры гэтым звычайныя наземныя пераходы, звяртае ўвагу жанчына, побач адсутнічаюць.
Многія салідарныя з ёй у каментарах: «Гэтыя пераходы ў «Мінск-Свеце» жудасныя з іх спускавымі сістэмамі, якія зусім не працуюць. У мяне вазок важыць больш за 10 кілаграмаў і дзіця — 15 кілаграмаў, а сама я 50, усё гэта цяжка і небяспечна».
«Вельмі вас разумею: сястра прыязджае з дзіцём у вазку і ўсё тое самае. Вось вам і новы раён з упарадкаванасцю. Ліфты для выгляду. Як інваліды спускаюцца?»
«Гэта норма. У нас у Барысаве пабудавалі падземку і ліфт, ні дня не працаваў ад слова зусім — выключна для прыгажосці», — скардзяцца беларускі.
«Я ўвогуле баялася ў гэтыя ліфты заходзіць. У гэтых пераходах досыць бязлюдна, а ліфты ездзяць абы як. Страшна там захраснуць», — падзялілася боязямі яшчэ адна жанчына.
«21 стагоддзе на двары, калі будуеце, улічвайце ўсе катэгорыі грамадзян!» — заклікаюць у каментарах. Нехта ўвогуле адзначае, што падземныя пераходы ў новых густанаселеных раёнах сёння — гэта злачынства.
Але знайшліся і тыя, хто пажартаваў з маладой маці: маўляў, набыла жытло ў бюджэтным раёне, а не элітным, дык чаго скардзішся?
Больш дасведчаныя маці падзяліліся ўжо выпрацаванымі лайфхакамі: «На задніх колах можна спускацца і падымацца па лесвіцы. Я так раблю».
Раней КДК заяўляў пра шматлікія парушэнні, выяўленыя пры будаўніцтве комплексу «Мінск-Свет». Забудоўшчык, «Дана Астра», быў вымушаны заплаціць вялікія штрафы.
Цяпер чытаюць
Ці варта купляць закінутую хату за адну базавую і колькі гэта каштуе насамрэч? Вось што расказваюць людзі3
Каментары