Данія можа адказаць амерыканцам за Грэнландыю асіметрычным ударам. І гэта будзе адчувальна для эліт
Хоць Данія і не можа пахваліцца першай арміяй у свеце і магутным флотам для абароны Грэнландыі, але краіна мае некалькі непрыемных сюрпрызаў для ЗША, адзін з якіх можа істотна паўплываць на фігуры багатых амерыканцаў.
Падчас першага тэрміну на пасадзе прэзідэнта ЗША Дональд Трамп неаднаразова выказваў ідэю адносна куплі Грэнландыі. Тады гэтыя заявы ўспрымаліся як жарт, але цяпер, калі Трамп паўтарае свае заклікі і суправаджае іх пагрозамі на адрас Даніі і некалькіх іншых саюзных краін, сітуацыя выглядае больш сур’ёзнай.
Аднак Данія, нягледзячы на маленькую армію і несувымерную з ЗША эканоміку, далёка не такая безабаронная ў гэтай сітуацыі. Краіна мае некалькі магутных эканамічных і палітычных інструментаў, здольных прымусіць ЗША задумацца, піша выданне Foreign Policy.
Па-першае, у Даніі знаходзіцца кампанія Maersk — другая ў свеце па магутнасці суднаходная лінія, якая спецыялізуецца на кантэйнерных перавозках. Больш за 14% усяго сусветнага флоту кантэйнеравозаў належыць дацкай Maersk, і ў 2023 годзе кампанія перавезла каля 24 мільёнаў кантэйнераў на сваіх 672 суднах. Калі ўлады Даніі загадаюць Maersk спыніць перавозкі ў ЗША, гэта можа прывесці да сур’ёзных лагістычных праблем для амерыканскага бізнэсу і спажыўцоў. Такі крок стаў бы балючым ударам для эканомікі ЗША.
Другі магутны рычаг Даніі — гэта фармацэўтычны гігант Novo Nordisk, вытворца семаглутыду, асноўнага інгрэдыенту мегапапулярных у ЗША прэпаратаў для пахудзення і лячэння дыябету Ozempic і Wegovy, якімі карыстаюцца мільёны заможных амерыканцаў, сярод якіх многія прадстаўнікі палітычных, культурных, інтэлектуальных эліт.
Гэтыя прэпараты зрабілі рэвалюцыю ў медыцыне ЗША, і попыт на іх імкліва расце. Колькасць рэцэптаў на Ozempic у Амерыцы падскочыла на 400% за перыяд з 2021 па 2023 год, дасягнуўшы 2,6 мільёна ў канцы 2023 года. Больш за паўмільёна амерыканцаў прымалі Wegovy у маі 2023 года.
Пакуль што вытворчасць семаглутыду амаль цалкам засяроджаная ў Даніі, і нават нягледзячы на спробы амерыканскіх кампаній стварыць альтэрнатыву, сапраўдны Ozempic вырабіць у ЗША пакуль не ўдалося.
Дацкі фармацэўтычны гігант Novo Nordisk зарабляе велізарныя грошы на рынку ЗША, і, каб задаволіць попыт, кампанія інвеставала $4,1 мільярда ў будаўніцтва новага прадпрыемства ў Паўночнай Караліне, які вырабляе семаглутыд. Але калі планы ЗША па Грэнландыі зойдуць занадта далёка, дацкі ўрад можа загадаць Novo Nordisk цалкам спыніць бізнэс у ЗША і абмежаваць туды свае пастаўкі.
Дзеянні Даніі ў адказ могуць стаць сур’ёзным ударам для Злучаных Штатаў, асабліва ўлічваючы, што як Maersk, так і Novo Nordisk маюць важнае стратэгічнае значэнне для амерыканскай эканомікі. Гэта можа ператварыць намеры Трампа па Грэнландыі ў небяспечную авантуру, якая створыць для яго больш праблем, чым выгады, падагульняе Foreign Policy.
Каментары