Былая гомельская суддзя-«кілер» уладкавалася на працу ў «Дабраном»
Да 2020 года бадай што кожны апазіцыянер у Гомелі ведаў імя суддзі Марыны Домненкі. Доўгі час гэта жанчына лідзіравала ў спісе праваабаронцаў як адна з найбольш рэпрэсіўных супрацоўніц судовай сістэмы краіны, якая спецыялізавалася менавіта на пераследзе апазіцыянераў і журналістаў. Аднак у 2022 годзе яна нечакана падала ў адстаўку. Выданне «Штодзень» высветліла, куды Марына Домненка пасля таго падзелася.
На фоне таго, што ў Беларусі стала рабіцца пасля 2020 года, тагачасныя судовыя рашэнні Марыны Домненкі выглядаюць амаль вегетарыянскімі — звычайна яна давала актывістам штрафы ці суткі. Але менавіта такім чынам фармавалася і абкатвалася тая сістэма, якая напоўніцу разгарнулася пазней.
Пасля выбараў 2020 года прозвішча Марыны Домненкі таксама было сярод «ударнікаў» па палітычных прысудах. За адзін дзень яна магла асудзіць па 6 чалавек, прычым усе яны атрымлівалі максімальнае на той час пакаранне — па 15 сутак.
Марына Домненка (у дзявоцтве Куляшова) нарадзілася 30 ліпеня 1971 года, і яе біяграфія не была надта багатай і пакручастай. Яна сапраўдны чалавек сістэмы, у якую прыйшла адразу пасля атрымання юрыдычнай адукацыі і цалкам у яе ўпісалася.
«Што да рэнамэ Домненкі, то сярод усіх нас, актывістаў, палітычных дзеячаў, яна мела мянушку «кілер». Мы яе так і называлі: «Кілер». Яна — адна з такіх, хто заўсёды давала максімальныя пакаранні. Не чалавек, а робат», — згадвае пра яе праваабаронца і былы палітвязень з Гомеля Леанід Судаленка.
Пры гэтым асаблівых багаццяў за гэту службу жанчына, як выглядае, не нажыла. Пры дапамозе «Кіберпартызанаў» выданню «Штодзень» удалося даведацца, што разам з мужам, міліцэйскім адстаўніком, Марына Домненка вырасціла двух сыноў. Жыве ж сям'я, калі верыць афіцыйным звесткам, у звычайнай кватэры шматпавярховага дома ў мікрараёне «Сельмаш». Ні катэджаў, ні дарагіх машын, гледзячы па ўсім, у яе няма.
Муж Марыны, Станіслаў Домненка, з якім яна жыве з 1990-х, у 2010-х гадах быў камандзірам роты батальёна дарожна-патрульнай службы ДАІ УУС Гомельскага выканкама. У скандалах альбо нейкіх сумнеўных гісторыях заўважаны не быў. У якім званні ён завяршыў сваю кар’еру, дакладна невядома, але на архіўным фотаздымку 2014 года ён сядзіць разам з абласным кіраўніцтвам ДАІ ў званні маёра.
Першы верыфікаваны запіс пра працоўны шлях Марыны Домненкі сведчыць, што ў студзені 2001 года яна ўладкавалася на працу ў Галоўнае ўпраўленне юстыцыі Гомельскага аблвыканкама. Пасля яна шмат гадоў менавіта там і працавала, пакуль не атрымала пасаду суддзі спачатку ў Чыгуначным, а потым у Цэнтральным раённым судзе. І, як згадвае Леанід Судаленка, практычна заўсёды выносіла па адміністрацыйных справах максімальна магчымыя прысуды. Запомнілася яна таксама асаблівым непрыманнем і нават пагардай да беларускай мовы і нацыянальнай сімволікі.
У маі 2022 года Аляксандр Лукашэнка адмысловым указам вызваліў ад пасадаў 23 суддзяў. Сярод тых, хто падаў у адстаўку, значылася і прозвішча Марыны Домненкі. Прычынай гэтага, найхутчэй, стала дасягненне пенсійнага ўзросту.
Але зусім з дзяржаўнай службы яна не пайшла, неўзабаве ўладкаваўшыся ў ЗАГС Гомельскага гарвыканкама простым спецыялістам.
Апошнім жа вядомым месцам працы Домненкі, як вынікае са звестак «Кіберпартызанаў», з'яўляецца ЗАТ «Дабраном» — сетка прадуктовых супермаркетаў. Але ніякіх дадатковых падрабязнасцей, акрамя таго, што былая суддзя была працаўладкаваная ў гэтай кампаніі прынамсі да сярэдзіны 2024 года, выявіць не ўдалося.
«Менавіта яны нараджаюць як герояў-пакутнікаў, так і лютых пачвар»
Суддзю, які асудзіў Ашурка і Аўтуховіча, прызначылі ў Вярхоўны суд
Хто такі Сяргей Салоўскі — суддзя, што ўвязніў музыкаў з Tor Band
«Ціхі чалавек з мяккім голасам». Хто тыя суддзя і пракурор, якія адправілі ў калонію блогера Клімовіча — палітвязня, які памёр за кратамі
Цяпер чытаюць
Мэр Мінска хацеў сабе пасаду ва ўрадзе, але Лукашэнка не пусціў2
Каментары