Byłaja homielskaja sudździa-«kiler» uładkavałasia na pracu ŭ «Dabranom»
Da 2020 hoda badaj što kožny apazicyjanier u Homieli viedaŭ imia sudździ Maryny Domnienki. Doŭhi čas heta žančyna lidziravała ŭ śpisie pravaabaroncaŭ jak adna z najbolš represiŭnych supracoŭnic sudovaj sistemy krainy, jakaja śpiecyjalizavałasia mienavita na pieraśledzie apazicyjanieraŭ i žurnalistaŭ. Adnak u 2022 hodzie jana niečakana padała ŭ adstaŭku. Vydańnie «Štodzień» vyśvietliła, kudy Maryna Domnienka paśla taho padziełasia.
Na fonie taho, što ŭ Biełarusi stała rabicca paśla 2020 hoda, tahačasnyja sudovyja rašeńni Maryny Domnienki vyhladajuć amal viehietaryjanskimi — zvyčajna jana davała aktyvistam štrafy ci sutki. Ale mienavita takim čynam farmavałasia i abkatvałasia taja sistema, jakaja napoŭnicu razharnułasia paźniej.
Paśla vybaraŭ 2020 hoda proźvišča Maryny Domnienki taksama było siarod «udarnikaŭ» pa palityčnych prysudach. Za adzin dzień jana mahła asudzić pa 6 čałaviek, pryčym usie jany atrymlivali maksimalnaje na toj čas pakarańnie — pa 15 sutak.
Maryna Domnienka (u dziavoctvie Kulašova) naradziłasia 30 lipienia 1971 hoda, i jaje bijahrafija nie była nadta bahataj i pakručastaj. Jana sapraŭdny čałaviek sistemy, u jakuju pryjšła adrazu paśla atrymańnia jurydyčnaj adukacyi i całkam u jaje ŭpisałasia.
«Što da rename Domnienki, to siarod usich nas, aktyvistaŭ, palityčnych dziejačaŭ, jana mieła mianušku «kiler». My jaje tak i nazyvali: «Kiler». Jana — adna z takich, chto zaŭsiody davała maksimalnyja pakarańni. Nie čałaviek, a robat», — zhadvaje pra jaje pravaabaronca i były palitviazień z Homiela Leanid Sudalenka.
Pry hetym asablivych bahaćciaŭ za hetu słužbu žančyna, jak vyhladaje, nie nažyła. Pry dapamozie «Kibierpartyzanaŭ» vydańniu «Štodzień» udałosia daviedacca, što razam z mužam, milicejskim adstaŭnikom, Maryna Domnienka vyraściła dvuch synoŭ. Žyvie ž siamja, kali vieryć aficyjnym źviestkam, u zvyčajnaj kvatery šmatpaviarchovaha doma ŭ mikrarajonie «Sielmaš». Ni katedžaŭ, ni darahich mašyn, hledziačy pa ŭsim, u jaje niama.
Muž Maryny, Stanisłaŭ Domnienka, ź jakim jana žyvie z 1990-ch, u 2010-ch hadach byŭ kamandziram roty bataljona darožna-patrulnaj słužby DAI UUS Homielskaha vykankama. U skandałach albo niejkich sumnieŭnych historyjach zaŭvažany nie byŭ. U jakim zvańni jon zaviaršyŭ svaju karjeru, dakładna nieviadoma, ale na archiŭnym fotazdymku 2014 hoda jon siadzić razam z abłasnym kiraŭnictvam DAI ŭ zvańni majora.
Pieršy vieryfikavany zapis pra pracoŭny šlach Maryny Domnienki śviedčyć, što ŭ studzieni 2001 hoda jana ŭładkavałasia na pracu ŭ Hałoŭnaje ŭpraŭleńnie justycyi Homielskaha abłvykankama. Paśla jana šmat hadoŭ mienavita tam i pracavała, pakul nie atrymała pasadu sudździ spačatku ŭ Čyhunačnym, a potym u Centralnym rajonnym sudzie. I, jak zhadvaje Leanid Sudalenka, praktyčna zaŭsiody vynosiła pa administracyjnych spravach maksimalna mahčymyja prysudy. Zapomniłasia jana taksama asablivym nieprymańniem i navat pahardaj da biełaruskaj movy i nacyjanalnaj simvoliki.
U mai 2022 hoda Alaksandr Łukašenka admysłovym ukazam vyzvaliŭ ad pasadaŭ 23 sudździaŭ. Siarod tych, chto padaŭ u adstaŭku, značyłasia i proźvišča Maryny Domnienki. Pryčynaj hetaha, najchutčej, stała dasiahnieńnie piensijnaha ŭzrostu.
Ale zusim ź dziaržaŭnaj słužby jana nie pajšła, nieŭzabavie ŭładkavaŭšysia ŭ ZAHS Homielskaha harvykankama prostym śpiecyjalistam.
Apošnim ža viadomym miescam pracy Domnienki, jak vynikaje sa źviestak «Kibierpartyzanaŭ», źjaŭlajecca ZAT «Dabranom» — sietka praduktovych supiermarkietaŭ. Ale nijakich dadatkovych padrabiaznaściej, akramia taho, što byłaja sudździa była pracaŭładkavanaja ŭ hetaj kampanii prynamsi da siaredziny 2024 hoda, vyjavić nie ŭdałosia.
«Mienavita jany naradžajuć jak hierojaŭ-pakutnikaŭ, tak i lutych pačvar»
Sudździu, jaki asudziŭ Ašurka i Aŭtuchoviča, pryznačyli ŭ Viarchoŭny sud
Chto taki Siarhiej Sałoŭski — sudździa, što ŭviaźniŭ muzykaŭ z Tor Band
«Cichi čałaviek ź miakkim hołasam». Chto tyja sudździa i prakuror, jakija adpravili ŭ kałoniju błohiera Klimoviča — palitviaźnia, jaki pamior za kratami
Kamientary