Нават калі вы праводзіце за сталом па 10 гадзін у дзень, ёсць шанец выправіць сітуацыю. Даследаванне паказала: шкоду ад сядзячай працы можна змякчыць — трэба толькі больш рухацца. Колькі крокаў дастаткова?
Сучасная рэчаіснасць робіць маларухомы лад жыцця нормай: офісная праца, транспарт, адпачынак перад экранамі. Вядома, што працяглае сядзенне звязана з павышанай рызыкай сардэчна-сасудзістых захворванняў, дыябету, анкалогіі і скарачэннем працягласці жыцця. Але да нядаўняга часу заставалася адкрытым пытанне: ці можна нейтралізаваць гэтыя рызыкі такой простай фізічнай актыўнасцю, як хадзьба?
Як піша Science Alert, адказ далі навукоўцы Сіднейскага ўніверсітэта, якія прааналізавалі даныя больш як 72 000 чалавек (сярэдні век склаў 61 год, 58% — жанчыны) з маштабнага брытанскага праекта UK Biobank — доўгатэрміновага даследавання, запушчанага ў 2006 годзе і разлічанага прынамсі на 30 гадоў назіранняў. У сярэднім для кожнага ўдзельніка было сабрана па 6,9 года звестак пра агульны стан здароўя.
На працягу тыдня ўдзельнікі насілі на запясцях аксэлерометры, каб вызначыць узровень фізічнай актыўнасці — колькі крокаў яны рабілі і колькі часу праводзілі ў сядзячым становішчы.
Сярэдні час, праведзены ў сядзячым палажэнні, склаў 10,6 гадзіны на дзень. Тых, хто сядзеў больш за 10,5 гадзіны, аднеслі да групы з «высокім узроўнем сядзячага ладу жыцця», астатніх — да групы з «нізкім узроўнем». З аналізу выключылі людзей, чый стан здароўя на працягу першых двух гадоў назіранняў мог паўплываць на ўзровень актыўнасці — такім чынам, вынікі датычацца толькі адносна здаровых людзей.
Даследаванне паказала: для тых, хто большую частку дня праводзіць седзячы, аптымальная колькасць крокаў — ад 9 000 да 10 000 за дзень. У гэтым дыяпазоне рызыка сардэчна-сасудзістых захворванняў зніжалася на 21%, а рызыка смерці — на 39%.
Пры гэтым прыкладна палова карыснага эфекту для здароўя дасягалася ўжо на ўзроўні 4000—4500 крокаў у дзень. Інакш кажучы, нават умеранае павелічэнне актыўнасці значна паляпшае стан здароўя.
«Любы паказчык, вышэйшы за 2200 крокаў на дзень, быў звязаны з меншай рызыкай смерці і сардэчна-сасудзістых захворванняў — як пры высокім, так і пры нізкім узроўні сядзячага ладу жыцця», — адзначаюць аўтары.
Цапкала і Балкунец атакавалі літоўскага палітыка, які дапамагаў беларусам пасля 2020‑га і спрычыніўся да справы, якую завёў пракурор у Гаазе28
Каментары