Легенду Мінска будуць судзіць за тое, што яна хадзіла з бел-чырвона-белым значком на адзенні.
Супраць 78-гадовай грамадскай актывісткі Ніны Багінскай завялі крымінальную справу паводле арт. 342-2 Крымінальнага кодэкса (неаднаразовае парушэнне парадку арганізацыі або правядзення масавых мерапрыемстваў). Прычынай сталі шпацыры са значком бел-чырвона-белага колеру на адзенні і дэманстрацыя нацыянальнай сімволікі на вуліцах Мінску ў 2024 годзе. Неўзабаве распачнецца разбіральніцтва ў судзе Першамайскага раёна Мінска, піша «Вясна».
Як стала вядома праваабаронцам «Вясны», Ніну Багінскую на працягу 2024 года тры разы прыцягвалі да адміністрацыйнай адказнасці паводле арт. 24.23 (несанкцыянаванае пікетаванне). Агульная сума штрафаў склала 7200 рублёў (180 базавых велічыняў). Апроч гэтага, на яе складзеныя яшчэ пяць пратаколаў. Прычынай для адміністрацыйнага пераследу быў шпацыр па цэнтру Мінска са значком бел-чырвона-белага колеру на адзенні, а таксама неаднаразовая «дэманстрацыя бел-чырвона-белай сімволікі» на вуліцах Мінска.
Ніну Багінскую неаднаразова затрымлівалі, утрымлівалі ў міліцэйскім аддзяленні ў кайданках, штрафавалі. Апроч гэтага, супрацоўнікі прэвентыўна яе затрымлівалі з дому на важныя даты, напрыклад, Дзень волі, 9 мая і г.д. Актывістка прынцыпова не хадзіла на свае суды.
У выніку, супраць Ніны Багінскай завялі крымінальную справу. У Беларусі паводле арт. 342-2 КК асуджаныя толькі шэсць чалавек. Гэты артыкул быў уведзены ў Крымінальны кодэкс у 2021 годзе, паводле арт. 342-2 КК дастаткова двойчы на працягу аднаго года быць падвергнутым адміністрацыйнаму спагнанню за здзяйсненне адміністрацыйных правапарушэнняў, прадугледжаных артыкулам 24.23 Кодэкса Рэспублікі Беларусь аб адміністрацыйных правапарушэннях, і на працягу года пасля накладання другога адміністрацыйнага спагнання за такія дзеянні зноў парушыць парадак арганізацыі або правядзення масавых мерапрыемстваў.
Вядома, што падчас следства па крымінальнай справе жанчыну некалькі разоў вазілі на псіхіятрычную экспертызу.
Ніне Багінскай пагражае арышт (да 3 месяцаў), альбо хатняя хімія (да 3 гадоў), альбо калонія (да 3 гадоў).
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім1414
Каментары
[Зрэдагавана]