Спрадвеку залаты карась быў шырока распаўсюджаны ў рэках і азёрах Беларусі, але ў апошнія дзесяцігоддзі ягоная колькасць катастрафічна змяншаецца, піша тэлеграм-канал «Дзікая прырода побач».
Прычына праблемы — у канкурэнцыі з боку срэбнага карася, якога завезлі ў Беларусь у канцы 1940-х гадоў з басейна ракі Амур для рыбнай гаспадаркі. Гэты від хутка рос, актыўна міграваў і ў выніку захапіў большасць вадаёмаў краіны.
Срэбны карась лепш за залатога пераносіць дэфіцыт кіслароду і забруджванне вады. А самкі срэбнага карася паспяхова размнажаюцца нават без сваіх самцоў — іх ікрынкі могуць апладняць іншыя віды рыб.
Эколагі просяць рыбаловаў з увагай ставіцца да гэтай праблемы і раяць пры вылоўліванні адпускаць залатых карасёў назад у вадаём, а таксама не выкарыстоўваць срэбнага карася як жыўца там, дзе жыве залаты.
Акрамя гэтага, рэкамендуецца не падсяляць срэбнага карася ў вадаёмы, дзе жыве залаты, і фіксаваць наяўнасць залатога карася ў прамысловых уловах, адрозніваючы яго ад срэбнага, пры напісанні справаздачы.
Цяпер чытаюць
Вядучы СТБ Раман Пратасевіч пабраўся шлюбам трэцім разам32
Каментары