У Еўропе не ведаюць, адкуль узяць салдат для адпраўкі міратворцаў ва Украіну

На сустрэчы еўрапейскіх лідараў 19 жніўня абмяркоўвалася адпраўка кантынгенту ва Украіну пасля завяршэння ваенных дзеянняў. Прадстаўнікі каля 10 краін, уключаючы Вялікабрытанію і Францыю, нібыта гатовыя даць войскі.

Прэзідэнт Францыі Эмануэль Макрон заявіў, што Еўропа гатовая разгарнуць «сілы падтрымкі» — брытанскія, французскія, нямецкія, турэцкія і іншыя — для аперацый у паветры, на моры і на сушы. Прэзідэнт ЗША Дональд Трамп, праўда, выключыў адпраўку амерыканскіх салдат, адзначыўшы, што першымі ва Украіну прыйдуць вайскоўцы Францыі, Германіі і Вялікабрытаніі.

Аднак застаюцца многія пытанні: якія краіны канкрэтна адправяць войскі, на якіх умовах іх размесцяць, як яны будуць рэагаваць на напады, хто будзе за гэта ўсё плаціць.

Каб абараніць сябе ад магчымай агрэсіі Расіі, салдатам патрэбен «баявы мандат», аднак кантроль за выкананнем міратворчай місіі ляжыць на ўкраінскіх войсках. Французскія чыноўнікі ўжо папярэдзілі пра небяспеку «тэарэтызацыі» пры адпраўцы войскаў.

Лідарамі кааліцыі з’яўляюцца Эмануэль Макрон і прэм’ер-міністр Вялікабрытаніі Кір Стармер, якія хочуць засведчыць важную ролю сваіх краін на сусветнай арэне. У абодвух, аднак, хісткія пазіцыі ўнутры краіны, што робіць план складаным для рэалізацыі.

У Германіі ёсць праблемы з колькасцю войскаў. Хоць федэральны канцлер Фрыдрых Мерц здолеў правесці закон аб павелічэнні фінансавання Бундэсвера, ягоная рэформа яшчэ далёкая да завяршэння. Цяпер у нямецкай арміі крыху больш за 182 000 салдат, а пастаяннае разгортванне бранятанкавай брыгады ў Літве адбываецца паэтапна. Да патрэбных 5000 баяздольных вайскоўцаў гэты кантынгент дасягне толькі ў 2027 годзе.

Сам Мерц прызнаў, што пакуль рана даваць канчатковыя адказы. Сацыял-дэмакратычная партыя Германіі пры гэтым адзначае, што рашэнне аб адпраўцы войскаў павінен прымаць парламент, а не канцлер. Апазіцыйныя ж партыі, «Альтэрнатыва для Германіі» і Левая партыя, катэгарычна супраць размяшчэння войскаў ва Украіне.

Польшча, нягледзячы на сваю вялікую армію, не збіраецца адпраўляць ва Украіну сваіх вайскоўцаў, хоць і бярэцца дапамагчы з лагістыкай. Паводле слоў польскага чыноўніка, Польшча не можа аслабіць свае ўласныя сілы на мяжы з Расіяй і Беларуссю.

Прэм’ерка Італіі Джорджа Мелоні лічыць больш разумным прапанаваць Украіне абарончую дамову замест войскаў, якія могуць быць уцягнутыя ў непасрэдны канфлікт з Расіяй. Яна прапанавала гарантыі Украіне па прыкладзе 5-га артыкула НАТА аб калектыўнай абароне замест ідэі Макрона аб адпраўцы вайскоўцаў.

«Калі адзін з нашых салдат загіне, мы заплюшчым вочы ці павінны будзем адрэагаваць? Таму што калі мы адрэагуем, відавочна, што гэта давядзецца рабіць НАТА. І тады мы маглі б неадкладна актываваць палажэнні [артыкула 5]», — сказала Джорджа Мелоні.

• 0
• 0
• 1
• 1
• 0
• 0
• 1
• 0