А ў Брэсце пачалі выпускаць новыя намазкі і пасты — нават з мясам лобстара, сапраўдным.
Кастрычнік падарыў беларусам мноства цікавых навінак ад айчынных брэндаў, якія радуюць арыгінальнымі прадуктамі і крэатыўнымі рашэннямі. Гэта не толькі разнастайнасць смакаў, але і калекцыі, якія натхняюць на творчасць. Office Life падрыхтаваў падборку самых цікавых навінак.
Шакаладны квас
«Лідскі квас» прадставіў два ўнікальныя смакі, якія пацешаць аматараў незвычайных спалучэнняў. Першы — шакаладны з лясным арэхам: менавіта беларускі шакалад, а не дакучлівы дубайскі. Другі смак заглыбляе ў атмасферу свята з нотамі мандарына, гваздзікі і карыцы.
Таксама новы смак квасу выпусціла кампанія «Аліварыя» — «Вішня-карыца». Гэта лімітаваная версія цёмнага квасу — цікавае спалучэнне жытняга складніка са слодыччу.
Салёны кефір са смакам карнішона
Цікавую навінку прапануе Горацкі харчовы камбінат — першы салёны смак кефірнай Exponenta «карнішон — кроп». Прадукт не ўтрымлівае цукар, у яго аснове — сыроватачныя бялкі, якія лёгка і хутка засвойваюцца.
Цукеркі са смакам колы
Не забылася пра навінкі і кандытарская фабрыка «Камунарка». Іх у яе адразу тры.
Першая — цукеркі са смакам колы, якія змяшчаюць двухслойную начынку з вадкім цэнтрам, якая перадае смак папулярнага напою.
Другая — цукеркі ў малочным шакаладзе з арыгінальным спалучэннем сакавітых малінаў і экзатычнага кактуса. Цукерка мае камбінаваны корпус і насычаную вадкую начынку.
І, нарэшце, яшчэ адна навінка — малочны шакалад з карамеллю, арахісам і фундукам.
Баблці ў ёгурце
«Малочны свет» радуе аматараў трэндавай кулінарыі сакавітымі шарыкамі з bubble tea ў далікатным ёгурце. У шарыкаў на аснове натуральнага соку тры яркія смакі: апельсін (у ёгурце са смакам колы), клубніцы і маракуя. У кожнай упакоўцы ёсць лыжка.
Цукар з перцам
На прылаўках беларускіх магазінаў хутка з'явяцца новыя віды цукру ад завода ў Жабінцы — цукар з перцам і з карыцай. Як кажа вытворца, цукар з карыцай падыдзе аматарам класічных спалучэнняў, а цукар з перцам стане знаходкай для тых, хто гатовы да кулінарных эксперыментаў.
Чатыры новыя смакі для «Намазкі»
Брэсцкі мясакамбінат выпусціў адразу чатыры новыя смакі для папулярнай «Намазкі» — з труфелем, сметанкова-часночны, з хрэнам і часнаком, з папрыкай. Кансістэнцыя ў прадукта мяккая і далікатная, пры гэтым захаваная тэкстура мяснога валакна.
Таксама кампанія актыўна замацоўваецца ў сегменце гатовай ежы, які хутка расце. Цяпер на БМК падрыхтавалі серыю вячэр для гарніраў — свініна ў сметанкова-сырным, сметанкова-часночным, сметанкова-грыбным і таматным соусах.
Паста з лобстараў
Bremor прадставіла новую пасту з натуральным мясам лобстараў. Абяцаюць яркі, вытанчаны густ «з высокай ступенню запамінальнасці».
Сырныя шарыкі з крэветкай
Пастаўскі малочны завод цяпер выпускае два новыя смакі сырных шарыкаў: крэветка на грылі і «Тай-Чылі».
Сырныя шарыкі вырабляюцца без выкарыстання дадатковых тлушчаў метадам высушвання сыру на спецыяльным абсталяванні. Вытворца запэўнівае, што па смакавых якасцях яны не саступаюць чыпсам. Яны падыходзяць для тых, хто вядзе здаровы лад жыцця.
Рапсавы алей з праванскай травой
Не застаўся ўбаку і Мінскі маргарынавы завод. У лінейцы гандлёвай маркі «Залатая кропля» з'явіўся рапсавы алей у шкляной бутэльцы і яго варыянт з водарам праванскіх траў.
Новыя смакі рыетаў і каўбасак
«Ганна» выпусціла адразу тры новыя смакі мясных рыетаў — з таматамі, з зелянінай і класічны. Як піша вытворца, гэта не проста паштэты — кансістэнцыя ў рыетаў мяккая і далікатная, але пры гэтым захаваная тэкстура мяснога валакна.
Акрамя рыетаў, брэнд папоўніў лінейку смакаў вэнджаных каўбасак. Тут іх таксама тры: з чарамшой, з гарчыцай і з пажытнікам.
Чыпсы з кімчы і сцягам Паўночнай Карэі
Новы смак чыпсаў вядомай маркі «Прэм'ер» — «Кімчы рамен». На ўпакоўцы прадукту намаляваны сцяг Паўночнай Карэі, а прадаюцца чыпсы ў сетцы будаўнічых гіпермаркетаў. Таксама гаворыцца, што гэта «абмежаваная серыя».
Калекцыя адзення з адсылкай да мастацтва ХХ стагоддзя
Віцебскі брэнд LSD Clothing прадставіў новую калекцыю UNOVIS, прысвечаную супрэматызму. Гэтая калекцыя навеяная рэвалюцыяй у мастацтве пачатку ХХ стагоддзя і пераасэнсаваннем візуальных сістэм.
Унікальныя дызайны адлюстроўваюць шматслойнасць творчасці праз элементарныя фігуры: квадрат, трохвугольнік і круг.
Цяпер чытаюць
«Размаўляў увесь час па-беларуску». Павел Севярынец запісаў свой першы зварот пасля вызвалення10
Каментары