Не прабыў на фронце і пяці дзён, застаўся толькі абгарэлы труп. У вайне супраць Украіны загінуў ураджэнец Светлагорскага раёна
Пра чарговы выпадак гібелі грамадзяніна Беларусі на вайне Расіі супраць Украіны даведаўся «Флагшток».
Паводле інфармацыі крыніцы, 33‑гадовы Дзяніс Сафронаў, які жыў у вёсцы Асташкавічы Светлагорскага раёна, не прабыў не на фронце і пяці дзён — на радзіму вярнулі ягоны абгарэлы труп.
Гісторыя Дзяніса Сафронава тыповая для беларускіх наймітаў — паехаў у Расію на заробкі, трапіў у турму, затым на фронт. Менавіта знаходзячыся ў зняволенні ўраджэнец Светлагорскага раёна быў завербаваны на вайну.
Тое, што Сафронаў быў асуджаны ў Расіі, пацвярджаюць апублікаваныя ў сеціве дакументы. Гэта адзіная даступная інфармацыя пра загінулага.
Беларуса, разам з яшчэ адным ураджэнцам Асташкавічаў, асудзілі ў сакавіку 2024 года па прыгаворы Даўгапрудненскага гарадскога суда Маскоўскай вобласці. У дакументах сказана, што Сафронаў меў сярэднюю спецыяльную адукацыю, у шлюбе не знаходзіўся, але меў на ўтрыманні малалетняе дзіця, працаваў электрамантажнікам. Яго асудзілі паводле ч. 3 арт. 162 КК РФ да 7 гадоў 6 месяцаў пазбаўлення волі з адбываннем пакарання ў папраўчай калоніі строгага рэжыму.
Беларусы былі прызнаныя вінаватымі ў разбоі групай асоб па папярэдняй змове, з ужываннем прадмета, які выкарыстоўваецца ў якасці зброі, з незаконным пранікненнем у жыллё. Злачынства было здзейснена 5 лютага 2023 года ў Даўгапрудным Маскоўскай вобласці. Па версіі следства, абвінавачаныя прыйшлі ў кватэру да знаёмага, ударылі яго бутэлькай па галаве, затым яго збілі і выкралі з кватэры два мабільныя тэлефоны і тэлевізар, пасля здаўшы рэчы ў ламбард.
Сафронаў не пагадзіўся з прысудам і падаў касацыйную скаргу, лічачы, што «выснова ў прысудзе аб наяўнасці ў яго свядомасці недастаткова абгрунтаваная, неабходна было правесці стацыянарную, а не амбулаторную псіхолага-псіхіятрычную экспертызу, паколькі ён хварэе на алкагалізм, раней неаднаразова атрымліваў траўмы галавы». Сцвярджаў, што бойку справакаваў пацярпелы і сам пагражаў нажом. Але скарга была адхіленая — гэта адбылося ў чэрвені 2025 года.
Пасля гэтага, верагодна, беларус быў этапаваны ў калонію, дзе яго і завербавалі ў войска.
Знаёмыя загінулага распавялі, што ён са шматдзетнай сям'і, маці гадавала дзяцей адна. Пасля школы мужчына працаваў у калгасе, пасля выехаў на заробкі ў Маскву, дзе яго кінулі на грошы. З турмы пайшоў на вайну, патэлефанаваў маці і паведаміў, што на фронце.
Верагодна, беларуса адправілі ў штурмавікі, і праз тры дні стала вядома, што ён загінуў. Гэта здарылася ў пачатку верасня. Пахавалі мужчыну ў другой палове кастрычніка.
Былы стачкамавец з Салігорска загінуў на вайне з Украінай
Малады ратавальнік з Асіповічаў стаў Бульбашом і загінуў на вайне за Расію
28‑гадовы беларус паехаў у Расію і ажаніўся. Адразу завербаваўся на вайну, паваяваў месяц — і загінуў
Мінімум 314 беларусаў загінулі ва Украіне, ваюючы за Расію. Сталі вядомыя імёны. Ад вярбоўкі да смерці праходзіць у сярэднім паўгода
«Вярнулі як быдла». Вызваленых расійскіх палонных адразу адпраўляюць назад на вайну
Каментары