Каб раздаць квіткі на Шамана, падключылі райвыканкамы. А ён запісаў відэа «Привет, Белоруссия!» і спяваў гімн Расіі
Квіткі на скандальнага рускаміраўскага спевака не прадаваліся зусім ніяк. Давялося ўключаць адміністратыўны рэсурс.
Перад прыездам у Мінск Шаман запісаў відэа «Привет, Белоруссия!», чым многіх абурыў.
Адказаў расіяніну і беларускі спявак AP$ENT — ён нават прысвяціў Шаману песню.
Пляцоўку для выступу ў Мінску Шаман выбраў не самую вялікую. Прэтэндаваць на «Мінск-Арэну» не стаў, спыніўся на Палацы Рэспублікі, вялікая зала якога змяшчае каля 2100 гледачоў. Прададзена было прыблізна 80% квіткоў — за некалькі гадзін да канцэрту не раскупленыя былі больш за 400 квіткоў. Каштавалі яны ад 104 да 405 рублёў.
Але з тым, каб напоўніць залу людзьмі, узніклі складанасці. У сацыяльных сетках можна пабачыць каментарыі, што прафсаюзы настойліва прапаноўвалі квіткі бюджэтнікам — з істотнай зніжкай, але з умовай абавязкова дайсці да канцэрту.
Гэтую ж інфармацыю пацвердзілі і крыніцы «Нашай Нівы».
«Першапачаткова білеты не прадаваліся, цікавасці не было ніякай. Была нават размова з Вайсковай акадэміяй, каб рыхтавалі рэзерв — гэта значыць, каб там вылучылі ў дзень канцэрта 100‑200 курсантаў, якія зоймуць вольныя месцы. Потым пусцілі разнарадку па райвыканкамах, каб выкупілі квіткі і там ужо на месцах іх размяркоўвалі. Мінімальна на раён трэба было выкупіць 30 білетаў».
Праігнаравалі канцэрт прыхільнікі Лукашэнкі, якія звычайна наведваюць выступы любых больш-менш папулярных расійскіх артыстаў.
Нават сёстры Груздзевы, якія прызнаюцца ў шалёнай любові да творчасці Шамана, здрадзілі спеваку. Яны пайшлі замест гэтага на канцэрт Аляксандра Малініна, які выступаў у канцэртнай залі «Мінск».
З беларускіх селебрыціс на канцэрце з’явілася маладая беларуская спявачка Наста Краўчанка — і толькі праз тое, што яе запрасілі выступіць там. Сам Шаман назваў дзяўчыну ўпрыгожаннем вечара.
У сацыяльных сетках даволі мала відэа з канцэрта Шамана — здаецца, нават тыя, хто там быў, не вельмі хочуць афішаваць гэта.
У якасці падарунка для беларусаў расійскі спявак, апрануты ў скураныя штаны ды атласную кашулю, спеў хіт «Песняроў» — «Белавежская пушча».
Праспяваў ён і сваю візітоўку — песню «Я русский». Падчас яе фонам на сцэне гарэла сэрца ў колерах расійскага сцяга.
Потым у расшпіленай кашулі і вузенькіх штанах артыст пачаў спяваць гімн Расіі.
Дзеля справядлівасці варта адзначыць, што прыхільнікі Шамана ўсё ж таксама былі. Фан-клуб артыста апублікаваў відэа, як яго сустракаюць на выхадзе з Палаца Рэспублікі. Людзі спявалі: «Я русский, я иду до конца!». Адна з жанчын крычала: «Яраслаў, мы вас любім! Мы з Дубліна прыехалі!». Аднак цяжка ацаніць, колькі менавіта чалавек засталося чакаць аўтографа Шамана.
Далей у Шамана запланаваныя яшчэ некалькі канцэртаў у Беларусі — у Брэсце, Гомелі і Гродна. Там квіткі больш танныя — ад 80 да 265 рублёў. Але не сказаць, каб там яны актыўна прадаваліся.
Першы з рэгіянальных канцэртаў адбудзецца ў Брэсце ў БАК па гульнявых відах спорту «Вікторыя» імя А.П. Мяшкова 10 снежня. Выглядае, што квіткі набываюцца цэнтралізавана. Бо калі гэта робяць звычайныя людзі самастойна, яны выбіраць розныя месцы ў залі, і не бывае такога, каб усюды выкупленая раўнюсенька палова раду ці рад цалкам.
У іншых гарадах сітуацыя прыблізна гэткая самая.
Каментары