Як стала вядома «Нашай Ніве», затрыманы генеральны дырэктар навукова-тэхналагічнай асацыяцыі «Інфапарк» Уладзімір Басько. Гэта знакавая фігура для беларускага ІТ, адзін з бацькоў-заснавальнікаў Парка высокіх тэхналогій.
Найбольш імаверна, што да яго прыйшлі па справе «Софтклуба».
Пра затрыманне Уладзіміра Басько «Нашай Ніве» стала вядома з некалькіх крыніц. Апошні раз Басько быў анлайн у пачатку лістапада, а апошні раз публічна з'яўляўся ў сярэдзіне кастрычніка на форуме «БанкІТ — 2025». На мерапрыемстве абмяркоўвалі выклікі і дасягненні ў сферы інфарматызацыі банкаўскіх паслуг.
Суразмоўцы «Нашай Нівы» звязваюць затрыманне Уладзіміра Басько са справай «Софтклуба», але дакладны сэнс прэтэнзій да яго невядомы.
Уладзімір Басько — гэта знакавая фігура беларускага ІТ.
Ён не праграміст, а функцыянер — адзін з бацькоў-заснавальнікаў Парка высокіх тэхналогій, найлепшая фігура для размовы з дзяржавай ад асобы калектыўнага айцішніка.
Басько стаяў ля вытокаў «Інфапарка» — арганізацыі з пачатку 2000-х, якая аб'яднала кіраўнікоў маладых амбіцыйных кампаній з яшчэ незразумелага для дзяржавы рынка. Там былі і ЕРАМ, і «Айтранзішн», і той жа «Софтклуб».
На базе «Інфапарка» фарміраваліся ідэі і патрабаванні галіны, якія ў выніку перакладваліся на законы — па кабінетах бегаў Басько, — і дапамагалі расці ўсяму сектару.
Аўтарытэт Басько ў 2023‑м выкарыстала дзяржава, прызначыўшы яго ў Камісію па вяртанні, якая павінна прымаць пакаянні беларусаў, вымушаных пакінуць радзіму праз палітычныя рэпрэсіі.
Знакамітай стала размова Уладзіміра Басько з Лукашэнкам у 2021 годзе. Басько ў чалабітных фармулёўках загаварыў пра сыход Лукашэнкі з пасады прэзідэнта, але — «я вас прашу», — з заклікам застацца «гарантам незалежнасці».
Лукашэнку думка не спадабалася, ён перабіў Басько словамі «нікуды я не пабягу».
Нагадаем, сэнс справы «Софтклуба» ў тым, што быццам бы існавала карупцыйная змова паміж кампаніяй-пастаўшчыком ІТ-рашэнняў і менеджарамі шэрагу банкаў. Яны нібыта атрымлівалі адкаты за лаяльнасць да канкрэтнага пастаўшчыка, але ў працэсе яшчэ і крэатыўна недаплачвалі падаткі, што і стала першаснай прычынай увагі органаў.
Чытайце таксама: Стала вядома сутнасць справы Софтклуба
Затрыманні пачаліся 23 кастрычніка 2025 года з арышту генеральнага дырэктара і стваральніка кампаніі «Софтклуб» Уладзіміра Сіроткі.
Чытайце: Справа Софтклуба: затрыманы патрыярх беларускага ІТ Уладзімір Сіротка і некалькі топ-менеджараў. Яны падарылі нам АРІП
Праз тры дні, 26 кастрычніка, сілавікі прыйшлі да старшыні праўлення Цэптар Банка Аляксандра Ігнатава. Пазней стала вядома аб праблемах у старшыні банка ВТБ Уладзіміра Ліхадзіеўскага, а таксама аб затрыманнях менеджараў сярэдняга звяна ў Прыёрбанку. Быў затрыманы экс-кіраўнік РРБ-Банка Віталь Дранкевіч, у мінулым сам следчы. Таксама вядома пра затрыманне былога выканаўчага дырэктара Банка развіцця Арцёма Мароза.
Чытайце таксама: Над шэрым кардыналам Нацбанка згусціліся хмары? Затрымалі яго сябра, былога выканаўчага дырэктара Банка развіцця
Кіраўніцтва «Софтклуба» абвінавачваюць, як вядома «Нашай Ніве», ва ўхіленні ад падаткаў і дачы хабару. Ніякай афіцыйнай інфармацыі пра гэтую справу яшчэ не было.
Цяпер чытаюць
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль7
Каментары