Андрэй Ярмак пасля вобшукаў і звальнення заявіў, што пойдзе на фронт
«Я — сумленны і прыстойны чалавек, мяне зганьбілі», — заявіў былы кіраўнік Офіса прэзідэнта Украіны.
Былы кіраўнік Офіса прэзідэнта Украіны Андрэй Ярмак паведаміў, што ідзе на фронт пасля таго, як падаў у адстаўку на фоне карупцыйнага скандалу і следчых дзеянняў Нацыянальнага антыкарупцыйнага бюро ў ягоным жыллі. Пра гэта ён заявіў у каментары амерыканскаму выданню New York Post, піша «Украінская праўда»
«Я іду на фронт і гатовы да любых рэпрэсій. Я — сумленны і прыстойны чалавек. Мяне зганьбілі, і маю годнасць не абаранілі, нягледзячы на тое, што я знаходжуся ў Кіеве з 24 лютага 2022 года. Я не хачу ствараць праблемы для Зяленскага — я іду на фронт. Я адчуваю агіду ад бруду, вылітага на мяне, і яшчэ большую агіду выклікае адсутнасць падтрымкі з боку тых, хто ведае праўду», — сказаў ён.
У каментары выданню Ярмак не ўдакладніў, у якім падраздзяленні плануе служыць і калі менавіта накіруецца ў зону баявых дзеянняў. Пасля эмацыйнага паведамлення ён перастаў адказваць на званкі.
Паводле даных СМІ, вобшукі ў Ермака звязаныя з расследаваннем НАБУ справы «Мідас» пра карупцыю ў энергетычнай сферы.
З-за адстаўкі Андрэя Ермака прэзідэнт Уладзімір Зяленскі абнавіў склад перамоўнай групы, якая гэтымі выхаднымі мае сустрэцца ў ЗША са спецпасланцам Дональда Трампа Стывам Уіткафам для абмеркавання «мірнага плана».
Па словах Зяленскага, украінскую дэлегацыю ўзначаліць начальнік Генеральнага штаба Андрэй Гнатаў. У групу таксама ўвайшлі прадстаўнікі Міністэрства замежных спраў, разведкі і сакратар Рады нацыянальнай бяспекі і абароны Рустэм Умераў.
Каментары