У Гродзенскім заапарку расказалі мілую гісторыю, як удалося ўратаваць птушак ад лісіных набегаў
Некалькі гадоў таму ў Гродне пачалі з’яўляцца лісы. Спачатку іх было мала, але паступова яны прывыклі да гарадскога жыцця і сталі частымі гасцямі ў тым ліку і ў мясцовым заапарку. Менавіта там яны пачалі паляваць на птушак — пасля іх начных набегаў работнікі знаходзілі забітых буслоў і гусей. А таму трэба было нешта з гэтым рабіць, піша прэс-служба заапарка.
Забіваць ліс у заапарку не хацелі, таму шукалі гуманныя спосабы барацьбы: спрабавалі петарды, шумавую зброю, пнеўматыку — але ўсё гэта дзейнічала толькі ненадоўга. Лісы вярталіся і прыдумлялі новыя хітрыя метады палявання.
Калі ўсе сродкі былі вычарпаныя, нехта прапанаваў пасяліць каля вадаёма сабаку, які б адпужваў драпежнікаў. Старэнькая лайка Вейса, якая ўжо жыла ў заапарку, для гэтага не падыходзіла, таму супрацоўнікі паехалі ў прытулак «Адданае сэрца» шукаць маладога і моцнага сабаку.
Некалькі сабак ім адразу прапанавалі, але ніводзін з іх не падышоў. І раптам да ахоўніка асцярожна падышла вялікая беспародная сука, села побач і пачала глядзець яму ў вочы.
Супрацоўніцы прытулку здзівіліся: гэты сабака вельмі баяўся людзей, асабліва мужчын. Яго ўжо бралі з прытулку раней, але ў новай сям’і з яго здзекаваліся, і сабаку давялося вярнуць. З таго часу ён не давяраў людзям. А тут сам падышоў і не адыходзіць!
Было відаць, што жывёліна адчула: гэтыя людзі яе не пакрыўдзяць. Так у заапарку з’явілася Амірa. Спачатку яна ўсяго баялася, але паступова асвоілася і стала сапраўднай ахоўніцай птушак. Цяпер яна жыве ў сваёй будцы каля вадаёма, добрасумленна ахоўваючы тэрыторыю.
З выбарам не памыліліся: Аміра аказалася вельмі адказнай і пільнай вартаўніцай, а яшчэ — улюбёнкай супрацоўнікаў. Усе ведаюць пра яе цяжкі лёс і імкнуцца пачаставаць ды пагладзіць.
Галоўнае, што з таго часу, як Аміра з’явілася ў заапарку, лісы перасталі прыходзіць і вадаплаўныя птушкі цяпер у бяспецы.
Калі работнікі прытулку «Адданае сэрца» прыехалі паглядзець, як жыве іх былая гадаванка, Аміра, падумаўшы, што яе хочуць забраць, схавалася ў будку і не выходзіла з яе. У прытулку вырашылі: раз яна так рэагуе, значыць, у заапарку ёй добра, і пакінулі яе там жыць.
Цяпер чытаюць
«Я еду натхніцца ўкраінцамі». Святлана Ціханоўская пачала афіцыйны візіт ва Украіну20
Каментары