Dźvie ŭkrainki pajechali da steły ŭ Kupiansku, kab dakazać, što Zialenski sapraŭdy tam byŭ VIDEA
Publikacyja Uładzimiram Zialenskim videa z Kupianska vyklikała chvalu sprečak i niazhrabnych sprob źniapraŭdžvańnia z boku rasijskich resursaŭ. Kropku ŭ historyi pastavili dźvie ŭkrainki, jakija apublikavali svajo videa z taho ž miesca.
12 śniežnia prezident Ukrainy apublikavaŭ sełfi-videa na fonie ŭjaznoj steły Kupianska. Jano było źniataje na telefon iPhone17 Pro, jaki źjaviŭsia ŭ prodažy niekalki miesiacaŭ nazad. Zialenski paviedamiŭ pra naviedvańnie pieradavoha kamandnaha punkta 14‑j asobnaj miechanizavanaj bryhady. Pavodle źviestak OSINT-daśledčykaŭ, miesca zdymkaŭ znachodziłasia ŭ niepasrednaj blizkaści da frontu: prykładna za 1,15 km ad rasijskich pazicyj i ŭsiaho za 500 mietraŭ ad tak zvanaj «šeraj zony».
Adrazu paśla publikacyi rasijskija błohiery i ŚMI pačali śćviardžać, što rolik stary, a vizit — insceniroŭka. Jany dakazvali, što videa źniataje jašče ŭ 2022 hodzie, ale nie źviartali ŭvahu na novy telefon u kadry.
U jakaści hałoŭnaha dokazu jany padavali kadry z rasijskaha vyviedvalnaha bieśpiłotnika, zroblenyja, jak śćviardžałasia, na nastupnuju ranicu paśla vizitu.
Na hetych kadrach achoŭnyja sietki razarvanyja, u toj čas jak na videa Zialenskaha jany vyhladajuć praktyčna cełymi. Taksama istotna adroźnivajecca i sama steła, jakaja na novych zdymkach maje značna bolš paškodžańniaŭ.
Praź niekalki dzion u siecivie źjaviłasia novaje videa. Jaho aŭtarki — dźvie dziaŭčyny, jakija, vierahodna, majuć dačynieńnie da Sił abarony (u kadr traplaje vajskovaja kofta adnoj ź ich).
Dziaŭčyna za kadram vyrazna paznačaje čas:
«Zialenski byŭ učora ŭ Kupiansku, my z Natałkaj taksama zhaniajem siońnia».
Na kadrach, źniatych dziaŭčatami, sapraŭdy vidać, što steła vyhladaje inakš. Častki litar adsutničajuć, kanstrukcyja mocna pasiečana askołkami. Vidavočna, što pa joj byŭ naniesieny masavany ŭdar užo paśla adjezdu Zialenskaha. Achoŭnaja sietka taksama mocna paškodžanaja. U kadr traplajuć i raźbityja aŭtamabili — aŭtarka videa ŭdakładniaje, što jany naležali ŭkrainskim abaroncam.
Važnym elemientam, jaki abjadnoŭvaje abodva siužety, staŭ varožy BPŁA. Na videa Zialenskaha ŭ jašče cełaj achoŭnaj sietcy vyrazna bačny zabłytany bieśpiłotnik. Dziaŭčaty taksama akcentujuć uvahu na anałahičnym bieśpiłotniku, jaki visić u reštkach užo paškodžanaj sietki.
«I jon jašče nasiłkavany», — kamientuje dziaŭčyna, pakazvajučy na pahrozu.
Zdymka ledź nie skončyłasia trahična. Praź niekalki chvilin paśla prybyćcia detektar zajšoŭsia tryvožnym piskam — da dziaŭčat nabližaŭsia aktyŭny dron.
Pad kryki «Šumić! Lacić niešta! Uciakajma!» dziaŭčaty kinulisia naŭcioki. U apošniaj častcy videa — kadry paničnaj evakuacyi pad pisk detektara i emacyjnuju leksiku kiroŭcy.
Miarkujučy z taho, što videa trapiła ŭ internet, advažnym žančynam udałosia adarvacca ad pahoni.
Načalnik milicyi Brahina stralaŭ u svaju žonku. Jana cudam vyžyła9
Kamientary
Pakul ličycca za zielenskim.