Церцель: Пратасевіч працаваў на тэрыторыі шэрагу дзяржаў у баявой абстаноўцы

«Пацвярджаю: так, Пратасевіч з’яўляецца супрацоўнікам нашай замежнай разведкі. Гэты чалавек працаваў на тэрыторыі шэрагу дзяржаў у баявой абстаноўцы. Выконваў важныя задачы. Вядома, пра іх я гаварыць не магу. Магчыма, да канца (так бывае ў нашай прафесіі) гэта не будзе раскрыта. Але яго ўклад быў даволі значным па шэрагу аспектаў», — сказаў старшыня КДБ.

Іван Церцель падзяліўся некаторымі падрабязнасцямі. Напрыклад, у 2020 годзе кіраўнік КДБ «дакладваў пра задумы праціўніка»:

«У тым ліку — хто куды будзе ісці, каго накіроўваць, дзе яны плануюць што рабіць».

Упершыню пра тое, што Пратасевіч — «наш чалавек» і «даўні чалавек беларускай разведкі», Лукашэнка заявіў 31 кастрычніка.

«Доўга расказваць не буду. Пратасевіч — гэта супрацоўнік нашай разведкі. Нам трэба было яго затрымліваць? А вось пытанне, чаму яны [рэйсам Ryanair] у Вільню ляцелі [23 мая 2021 года — НН], там не селі, а развярнуліся і ў Мінск прыляцелі, селі пасля званка, што ў іх на борце там нейкая выбухоўка… Ну садзіцеся, вы ў Вільню ляцелі, над Вільняй былі — садзіцеся. Развярнуліся, прыляцелі ў Мінск. Селі ў Мінску. Я кажу: «Ну што, праводзьце аперацыю, ён жа пад прыкрыццём працаваў гэтых збеглых. Праводзьце аперацыю як належыць», — заявіў ён.

«Прыйшлося нам аперацыю праводзіць па яго затрыманні. Хаця нам не трэба было яго затрымліваць. Ён прыехаў у Грэцыю, яго туды выклікалі, ён давёў разведчыкам усё, што нас цікавіла, атрымаў заданне і ляцеў назад. Туды, дзе працаваў, праз Вільню. Нас абвінавацілі ў тым, што мы затрымалі апазіцыянера. А ён не наш апазіцыянер. Мы не затрымлівалі апазіцыянера. Вось увялі санкцыі», — сказаў Лукашэнка 31 кастрычніка, выступаючы ў Лепельскім раёне.

«У гэтай інфармацыі быў сур’ёзны працэнт звестак, якія здабываў Пратасевіч. Таму нашы праваахоўныя органы дзейнічалі ў той перыяд даволі ўпэўнена, ведалі, як сітуацыя будзе развівацца. Акрамя таго, цалкам дзякуючы яго працы мы валодалі дынамікай стварэння гэтых падрыўных цэнтраў: хто за імі стаяў, хто фінансаваў, хто (напрыклад, былы прэм’ер Польшчы) прыязджаў туды, якія грошы абяцаў, з якога фонду, колькі пасад выдзелілі на варшаўскі офіс, які там пэўныя «дзеячы культуры» цяпер спрабуюць развіваць безвынікова. Гэта яго [Рамана Пратасевіча] праца», — сказаў Іван Церцель.

Раней выказвалася меркаванне, што Раман Пратасевіч мог быць завербаваны беларускімі спецслужбамі ў 2010-я, але разарваць сувязі з імі пасля таго, як яму ўдалося выехаць у Польшчу.

Чытайце таксама: Каго і чаму здаў Раман Пратасевіч. Гэта гісторыя пра тое, як адно фота можа змяніць усё жыццё. Многа жыццяў 

Цяпер Мінск можа весці складаную гульню адносна яго, каб выкарыстоўваць яго для дыскрэдытацыі беларускай апазіцыі і адначасова, каб выйсці з-пад санкцый за прымусовую пасадку самалёта «Раянэйра» ў 2021 годзе.

• 0
• 0
• 44
• 8
• 1
• 0
• 2
• 0