У цэнтры Мінска таямніча знікла дачка дырэктара буйнога агракомплексу
21‑гадовая Яна Кастранкова перастала выходзіць на сувязь 30 снежня. Дзе яна цяпер — невядома.
Зніклая дзяўчына — Яна Кастранкова. У 2021 годзе яна скончыла Смалявіцкую раённую гімназію з залатым медалём, была пераможцай абласной алімпіяды па геаграфіі, дыпламанткай раённага конкурсу работ даследчага характару.
Мяркуючы па сацсетках Яны, дзяўчына працуе фатографкай. Гэта дачка Юрыя Кастранкова, дырэктара ААТ «Агра-Ляскавічы» (гаспадарка ўваходзіць у структуру Кіраўніцтва справамі прэзідэнта). Юрыя прызначылі на пасаду летась у лютым 2025 года. Пару месяцаў таму ён даваў справаздачу Лукашэнку, які вырашыў наведаць агракомплекс ва ўзорным аграгарадку ў Петрыкаўскім раёне.
Раней Кастранкоў узначальваў дзяржаўную Беларускую лясную кампанію.
Інфармацыю пра тое, што 21‑гадовую Яну не могуць знайсці блізкія, апублікаваў пошукава-ратавальны атрад «Анёл». Паведамлялася, што сувязь з дзяўчынай знікла 30 снежня 2025 года, дадому (жыве Яна ў «Маяку Мінска») яна і па сёння не вярнулася.
Маці Яны піша ў сацсетках, што апошні раз тэлефон яе дачкі быў зафіксаваны ў той дзень у 18:27 побач з паркам Чалюскінцаў. Жанчына кажа, што размаўляла з дачкой у дзень знікнення прыблізна ў 14:30. Тая казала, што, імаверна, прыйдзе да бацькоў сустракаць Новы год.
Маці распавяла ў сацсетках, што яны патэлефанавалі 1 студзеня ў 102, тады ж даслалі фота ў міліцыю, каб дачку пачалі шукаць па камерах. 2 студзеня напісала заяву аб знікненні.
Дзякуючы гарадскім камерам атрымалася высветліць толькі тое, што ў 16:30 Яна заходзіла ў «Дана Мол», а пасля сустракалася з жанчынай ля метро «Уручча». Тая жанчына была ўладальніцай кватэры, якую Яна хацела арандаваць, але перадумала — ля метро жанчына вярнула ёй задатак.
Пашпарт дзяўчыны застаўся дома, межы краіны, наколькі вядома, яна не перасякала.
З асабістых прыкмет у Яны татуіроўкі ў выглядзе сімвала бясконцасці на правым запясці і месяца на левым плячы.
18‑гадовы курсант Вайсковай акадэміі з Ляхавіч нікому нічога не сказаў, забраў дакументы і паехаў ваяваць за Расію. Цяпер па ім плачуць48
Каментары