Літоўскі міністр: Было б добра, каб Ціханоўская сама абвясціла пра свае планы
Міністр замежных спраў Літвы Кястуціс Будрыс заявіў, што Літва не зменшыць падтрымку беларускай апазіцыі, нягледзячы на інфармацыю пра намер Святланы Ціханоўскай пераехаць з Вільні ў Варшаву. Паводле яго слоў, матывацыя Літвы застаецца такой жа моцнай, як і раней, а дэмакратычныя працэсы ў Беларусі і парушэнні правоў чалавека будуць і надалей падымацца на міжнародным узроўні, паведамляе LRT.
Кястуціс Будрыс падкрэсліў, што Літва мае шматгадовы досвед і наладжаныя механізмы для падтрымкі дэмакратычных сіл у суседніх краінах, і гэтыя магчымасці нікуды не зніклі. Ён адзначыў, што для Літвы важна, каб Беларусь не знікала з міжнароднага парадку дня, і ў гэтым краіна бачыць сваю асаблівую ролю.
Міністр таксама заявіў, што інфармацыю пра планы пераезду павінна агучваць сама Ціханоўская або яе офіс, а не літоўскія ўлады. Ён дадаў, што неаднаразова сустракаўся з лідаркай беларускай апазіцыі і запэўніў яе ў далейшай падтрымцы з боку Літвы.
«Я лічу, што ўся камунікацыя пра тое, што яна мае намер рабіць, што мае намер рабіць яе офіс, павінна паходзіць перш за ўсё ад іх, а не я павінен паведамляць, хто дзе і што казаў, ведае і гэтак далей. Я размаўляў з Ціханоўскай на самыя розныя тэмы, сустракаўся не раз, у тым ліку зусім нядаўна. Але было б добра, калі б яна сама абвясціла пра свае планы», — адзначыў Будрыс.
Асобна Будрыс падкрэсліў, што для Літвы прыярытэтам застаецца бяспека беларускіх дэмакратычных сіл, якія знаходзяцца на яе тэрыторыі, а таксама іх дзейнасць. Паводле яго слоў, гэтыя прыярытэты не змяніліся.
Раней паведамлялася, што Ціханоўская праінфармавала літоўскіх парламентарыяў пра сваё рашэнне пераехаць у Варшаву, пры гэтым частка яе каманды, верагодна, застанецца працаваць у Вільні. У канцы 2025 года ўзровень аховы Ціханоўскай у Літве быў зніжаны: замест спецыяльнай службы яе пачала ахоўваць паліцыя, што ўлады патлумачылі зніжэннем узроўню пагроз.
Святлана Ціханоўская завяла трэдс. Што ёй пішуць беларусы?
Святлана Ціханоўская паведаміла літоўскім парламентарыям пра рашэнне пераехаць у Польшчу
AFP: Ціханоўская пераязджае з Літвы ў Польшчу
Ціханоўская: Дзеці не пераехалі ў ЗША, а проста часова будуць з татам дзеля бяспекі
Дарадца Ціханоўскай: Пасля змены ўзроўню аховы ўзмацніўся ціск на Офіс з боку рэжыму
Ландсбергіс пра рашэнне перадаць ахову Ціханоўскай паліцыі: Гэта выгадна Лукашэнку
Цяпер чытаюць
За мінулы год насельніцтва Беларусі скарацілася яшчэ на 53 тысячы чалавек18
Каментары