Незвычайная кампазіцыя ў цэнтры Варшавы аб'яднала тры народы. На сваю фігуру беларусы сабралі грошы самі
Карыстальнікі сацсетак заўважылі каля аднаго з каталіцкіх храмаў у цэнтры Варшавы незвычайную скульптурную кампазіцыю з сімваламі трох краін — Польшчы, Беларусі і Украіны. Тыя, хто не ў тэме, не зразумелі сэнс інсталяцыі, некаторыя выказалі сумнеў, якую краіну сімвалізуе адна з фігур — Беларусі ці Літвы? Выданне Katolik.life даведалася пра новую кампазіцыю і расказала падрабязнасці пра яе.
Гаворка ідзе пра калядную батлейку, якая была дапоўненая сёлета фігурамі Трох Каралёў і ўсталяваная каля касцёла Святога Аляксандра на плошчы Трох Крыжоў. Гэта — «Калядная батлейка трох народаў», якую можна ўбачыць каля храма да 2 лютага ўключна.
Сёлета з'явілася ідэя зрабіць батлейку міжнароднай. Новыя фігуры Трох Каралёў сапраўды сімвалізуюць Польшчу, Беларусь і Украіну, якія прыносяць свае дары Дзіцяці Езусу.
Перад асвячэннем фігур у касцёле праходзіла супольная Імша палякаў, беларусаў і ўкраінцаў. Службу з удзелам душпастыра беларусаў-каталікоў у Варшаве ксяндза Вячаслава Барка адпраўлялі на польскай мове з элементамі беларускай і ўкраінскай моў — у знак адзінства і ўзаемнай павагі народаў.
Беларусы самі сабралі грошы на сваю фігуру з гістарычным гербам краіны, якая абышлася ў 15 тысяч злотых (больш за 3500 еўра), каб засведчыць: тут ёсць беларусы, супольнасць жыве і памятае пра свае карані.
Гэтая плошча — сімвалічнае месца на карце Варшавы, якое знаходзіцца на сутыку важных артэрый горада, у раёне пасольстваў і міжнародных устаноў. У парафіі вырашылі, што месца патрабуе «паведамлення, якое будзе чытаным для ўсіх», і вырашылі стварыць калядную батлейку як знак міру і дыялогу. Аўтарам скульптур з'яўляецца Фаўстына Макарук.
Цяпер чытаюць
Пра што маўчыць Аляксей Францкевіч, якому Польшча закрыла ўезд на 10 гадоў54
Каментары