У мінскім метро патлумачылі, для чаго адлічваюць на гадзінніках час ад адпраўлення цягніка, а не да яго прыбыцця
У прэс-службе Мінскага метрапалітэна адказалі на пытанне, якое хоць раз узнікала ў амаль кожнага пасажыра: чаму электроннае табло на станцыях адлічвае час з моманту адпраўлення папярэдняга цягніка, а не да прыезду наступнага?
Як высветлілася, гэтыя гадзіннікі — так званыя інтэрвальныя — прызначаныя не для пасажыраў, а найперш для машыністаў. Менавіта ім важна дакладна ведаць, калі са станцыі выехаў папярэдні састаў, каб своечасова адправіцца самім і строга трымацца графіка руху.
У метрапалітэне адзначылі, што інтэрвальныя гадзіннікі — гэта інструмент, які гарантуе бяспеку і дакладнасць руху цягнікоў. Кіруючыся імі, машыніст можа не толькі пазбегнуць затрымак падчас пасадкі і высадкі пасажыраў, але і карэктаваць рух: калі цягнік спазняецца — паскорыцца, а калі адлегласць да папярэдняга саставу становіцца занадта малой — пачакаць, каб захаваць бяспечны інтэрвал.
Чаму на станцыях няма асобных табло, якія паказвалі б пасажырам, колькі часу засталося да наступнага цягніка, у прэс-службе не патлумачылі. У той жа час некаторыя карыстальнікі прапанавалі паставіць дадатковыя экраны — па прыкладзе іншых метрапалітэнаў.
Абмеркаванне ў сацсетках паказала, што меркаванні на гэты конт падзяліліся. Адны лічаць такую інфармацыю вельмі зручнай, іншыя ж упэўненыя, што яна нічога не зменіць: маўляў, калі чалавек ужо спусціўся ў метро, то ўсё роўна паедзе, незалежна ад таго, чакаць дзве хвіліны ці дзесяць.
Цяпер чытаюць
«Паездкай мы задаволеныя, але сівых валасоў дадалося». Жыхарка Светлагорска адпачыла ў Геленджыку і дзеліцца эмоцыямі9
«Паездкай мы задаволеныя, але сівых валасоў дадалося». Жыхарка Светлагорска адпачыла ў Геленджыку і дзеліцца эмоцыямі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1414
Каментары