Роберт Фіца назваў хлуслівай публікацыю, што ён нібыта кепска выказваўся пра псіхалагічны стан Трампа
Прэм’ер-міністр Славакіі Роберт Фіца заявіў, што катэгарычна адмаўляе публікацыю партала Politico, у якой сцвярджалася, што ён нібыта назваў псіхалагічны стан прэзідэнта ЗША Дональда Трампа «шакуючым» і «небяспечным». У Белым доме гэтую інфармацыю таксама назвалі фэйкам.
У допісе ў сацсетцы X Фіца напісаў, што Politico нібыта напісала хлусню пра яго ацэнку сустрэчы з Трампам на нефармальным саміце ЕС у Бруселі.
Паводле слоў прэм'ера Славакіі, не было ні сведкаў, ні публічных выказванняў, аднак гэта не перашкодзіла парталу, як ён сцвярджае, распаўсюдзіць хлуслівую інфармацыю.
Славацкі прэм’ер падкрэсліў, што падчас саміту ён не выступаў і не абмяркоўваў свой візіт у ЗША ў нефармальных размовах з іншымі лідарамі. Ён таксама адзначыў, што чакаў адмены паездкі ў Злучаныя Штаты пасля свайго рэзкага выказвання наконт сітуацыі ў Венесуэле. Гэтага, аднак, не адбылося, што, на думку палітыка, толькі павышае значэнне сустрэчы з амерыканскім прэзідэнтам.
Фіца нагадаў, што пасля затрымання венесуэльскага лідара Нікаласа Мадура амерыканскімі вайскоўцамі 3 студзеня ён жорстка раскрытыкаваў гэтую аперацыю, назваўшы яе нападам і «нафтавай авантурай». Пры гэтым ён падкрэсліваў, што гатовы адстойваць сваю пазіцыю нават коштам пагаршэння адносін з ЗША.
Партал Politico Фіца ахарактарызаваў як варожа настроены, прабрусельскі і ліберальны, які, на яго думку, імкнецца падарваць канструктыўныя сувязі Славакіі з іншымі краінамі. Ён таксама заявіў, што для гэтага выдання суверэнітэт, абарона нацыянальных інтарэсаў і ўласная думка лічацца ледзь не злачынствам.
Раней Politico сцвярджаў, што падчас саміту ЕС 22 студзеня Фіца нібыта расказваў іншым еўрапейскім лідарам пра сваё здзіўленне станам Трампа на сустрэчы ў Фларыдзе. Выданне спасылалася на пяць дыпламатаў, якія заяўлялі, што словы славацкага прэм’ера насілі вельмі негатыўны характар. Пры гэтым ніводная з крыніц не прысутнічала асабіста пры тых размовах.
У Вашынгтоне гэтыя сцвярджэнні рашуча адхілілі. Намесніца прэс-сакратаркі Белага дома Анна Келі назвала матэрыял Politico абсалютна фэйкавай навіной і падкрэсліла, што сустрэча Фіца і Трампа ў Мар-а-Лага 17 студзеня была канструктыўнай і прайшла ў пазітыўнай атмасферы.
Сам партал адзначаў, што словы, прыпісаныя Фіца, выклікалі рэзананс яшчэ і таму, што ён з’яўляецца адным з нямногіх еўрапейскіх лідараў, які адкрыта падтрымлівае Трампа па шэрагу пытанняў і неаднаразова крытыкаваў палітыку Еўрасаюза.
«Дык дадому забяры алкаша абасцанага і выходжвай». Малады загадчык аддзялення бальніцы не стрымлівае сябе ў выразах у сацсетках24
Каментары