У Славакіі школьнікам не спадабалася прарасійская лекцыя прэм'ера Фіца. Ён параіў ім ісці ваяваць на фронт
Сустрэча прэм’ер-міністра Славакіі Роберта Фіца з вучнямі старэйшых класаў гімназіі ў горадзе Попрад прайшла вельмі напружана. Гэта была другая спроба прачытаць ім лекцыю па знешняй палітыцы — першую адмянілі пасля таго, як вучань напісаў перад школай крытычны надпіс крэйдай, піша выданне Trnavak.
Падчас лекцыі Фіца шмат гаварыў пра Расію, некалькі разоў згадваў Пуціна і нават параіў маладым, калі яны хочуць нечага ад расійскага лідара, «назбіраць грошай і паехаць задаць яму пытанні асабіста». Ён таксама папракаў вучняў за тое, што яны прыйшлі на сустрэчу ў чорнай вопратцы, што было іх ціхім пратэстам.
Сітуацыя абвастрылася, калі Фіца загаварыў пра вайну ва Украіне. Ён сказаў: «Калі вы такія героі і за тую вайну — дык ідзіце туды ваяваць». Пасля гэтых слоў многія вучні падняліся, пачалі звінець ключамі (традыцыйны славацкі сімвал пратэсту) і выйшлі з залы. Адзін вучань трымаў пры гэтым украінскі сцяг. Фіца адказаў на шум словамі: «Ну то звініце ключамі».
Пасля таго, як відэа і сведчанні вучняў разышліся па сацсетках, Фіца заявіў на сваёй старонцы ў фэйсбуку, што тыя, хто «не хацеў слухаць», пайшлі, але на іх месца прыйшлі іншыя, гатовыя да дыскусіі.
Гэтая падзея стала працягам больш шырокага канфлікту: раней вучань Міхал быў выкліканы на допыт за надпіс крэйдай з крытыкай прэм’ера, што выклікала пратэсты ва ўсёй краіне. У Попрадзе ў дзень сустрэчы напружанасць адчувалася з самай раніцы, нават перад уваходам у будынак адбываліся канфлікты. Вучні чакалі Фіца ў чорнай вопратцы ў знак нязгоды з яго палітыкай і паводзінамі.
Цяпер чытаюць
«Знік без звестак» вельмі малады беларускі наёмнік2
«Знік без звестак» вельмі малады беларускі наёмнік
На Афоне адшукалі тры невядомыя раней асобнікі Астрожскай Бібліі. Для яе стварэння друкар Іван Фёдараў, выхадзец з Беларусі, выкарыстоўваў тэксты Скарыны66
Каментары