Хочаце жыць доўга — шукайце раён з нармальнымі дрэвамі. Навукоўцы высветлілі, што дрэвы ратуюць ад інфарктаў, а газоны могуць нават нашкодзіць здароўю

Новая праца амерыканскіх навукоўцаў, апублікаваная ў часопісе Environmental Epidemiology, упершыню дэталёва разабрала ўплыў розных тыпаў расліннасці на здароўе сэрца, выкарыстаўшы для гэтага штучны інтэлект і погляд з ракурсу пешахода, заўважыў тэлеграм-канал cybulinka.

Погляд вачыма пешахода

Даследчыкі ўжылі алгарытмы глыбокага навучання для аналізу 350 мільёнаў панарам сервісу Google Street View па ўсіх Злучаных Штатах. Нейрасетка літаральна па пікселях разбірала кожную выяву, вылучаючы дрэвы, траву і іншую зеляніну (кусты ці кветкі).

Павялічыць

Гэтыя звесткі супаставілі з гісторыяй здароўя 88 788 удзельніц маштабнага «Даследавання здароўя медсясцёр» (Nurses’ Health Study), за якімі назіралі на працягу 18 гадоў. Такі падыход дазволіў навукоўцам ацаніць менавіта тое асяроддзе, якое людзі бачаць штодзень перад сваімі вокнамі і падчас прагулак.

Дрэвы ратуюць, трава — не заўсёды

Вынікі аналізу былі неадназначнымі.

Навукоўцы зафіксавалі, што высокі працэнт бачных дрэў у радыусе 500 метраў ад дома статыстычна звязаны са зніжэннем рызыкі сардэчна-сасудзістых захворванняў, прычым гэтая сувязь была найбольш выразнай для ішэмічнай хваробы сэрца.

У той жа час павелічэнне плошчы газонаў і іншай нізкай расліннасці, наадварот, карэлявала з павышэннем рызыкі захворванняў. Гэтыя высновы засталіся ў сіле нават пасля ўліку такіх фактараў, як узровень даходаў, забруджванне паветра, шчыльнасць насельніцтва і лад жыцця пацыентак.

Чаму газон можа быць шкодным?

Тлумачэнне такой розніцы крыецца ў фізіялагічных і экалагічных механізмах.

Дрэвы значна больш эфектыўна зніжаюць стрэс праз прамы псіхафізіялагічны адказ арганізма, а таксама выдатна спраўляюцца з нейтралізацыяй гарадскога шуму, фільтрацыяй паветра і змякчэннем экстрэмальнай спёкі дзякуючы магутнаму ценю.

Трава і дробныя кусты такіх ахоўных уласцівасцяў практычна не маюць. Больш за тое, утрыманне ідэальных газонаў часта патрабуе выкарыстання пестыцыдаў і рэгулярнай працы шумных газонакасілак з рухавікамі ўнутранага згарання, што стварае дадатковую нагрузку на экалогію і нервовую сістэму.

Таксама вялікія травяністыя прасторы ў ЗША часта з'яўляюцца прыкметай раёнаў з нізкай шчыльнасцю забудовы, дзе гарадское асяроддзе не спрыяе шпацырам, прымушаючы жыхароў залежаць ад аўтамабіляў.

Павялічыць

Даследчыкі падкрэсліваюць, што выкарыстанне агульных спадарожнікавых індэксаў зеляніны магло раней маскаваць гэтую неаднароднасць, змешваючы карысныя дрэвы з патэнцыйна шкоднымі фактарамі, звязанымі з утрыманнем газонаў.

Вердыкт для каменных джунгляў

Для жыхароў такіх гарадоў, як Мінск, дзе ў новых раёнах усё азеляненне складаецца з травы і кволых саджанцаў паміж палямі заасфальтаваных парковак, гэтае даследаванне гучыць як трывожны сігнал. 

Для грамадскага здароўя гэта азначае неабходнасць перагляду стратэгій азелянення гарадоў. Навукоўцы заклікаюць палітыкаў і архітэктараў надаваць прыярытэт менавіта развіццю «гарадскіх лясоў» і захаванню дарослых дрэў, бо інвестыцыі ў дрэвавы масіў прыносяць значна большы медыцынскі эфект, чым стварэнне звычайных лугоў і кветнікаў.

• 12
• 0
• 1
• 0
• 2
• 0
• 0
• 1