Лыжнік з Гаіці заняў на Алімпіядзе апошняе месца, але сарваў апладысменты
Лыжнік з Гаіці Стывенсан Савар заняў апошняе месца ў гонцы на Алімпійскіх гульнях, але здолеў заваяваць сімпатыі гледачоў. Спартсмену 25 гадоў, і на гэтай Алімпіядзе ён не толькі нёс сцяг сваёй краіны, зборная якой складаецца ўсяго з двух чалавек, але і стаў першым прадстаўніком Гаіці ў лыжных гонках.
Стывенсан Савар фінішаваў 64-м, аднак на фінішы яго сустрэлі гучнымі апладысментамі. Перасякаючы фінішную рысу, ён у знак павагі пакланіўся публіцы. Дарэчы, зусім апошнім ён у выніковым пратаколе не быў, бо з дзясятак лыжнікаў па розных прычынах увогуле да канца дыстанцыі не дабеглі.
Спартсмен нарадзіўся ў Гаіці, але ва ўзросце трох гадоў яго ўсынавілі ў Францыі. З таго часу ён жыве і трэніруецца ў рэгіёне Вагезы, дзе і пачаў займацца лыжным спортам.
Сам Савар адзначае, што ўдзел у Алімпіядзе для яго — гэта магчымасць змагацца са стэрэатыпамі ў зімовых відах спорту. У дзяцінстве яму было цяжка быць адзіным цёмнаскурым лыжнікам, бо пастаянная ўвага да яго з боку старонніх людзей бянтэжыла. Але з гадамі, паводле яго слоў, гэта перастала мець значэнне, і цяпер ён проста займаецца тым, што любіць.
Увогуле ж першым зімовым алімпійцам Гаіці быў гарналыжнік Рычардсан Віяна. Ён дэбютаваў на мінулай Алімпіядзе ў Пекіне ў 2022 годзе, заняўшы 34‑е месца ў слаламе, і зноў выступае на цяперашніх гульнях. Як і Савар, ён нарадзіўся на Гаіці, а пасля быў усыноўлены.
«Мэта — паказаць лепшы вынік і пашырыць магчымасці, — гаворыць адносна гэтага Савар. — Насіць гэты касцюм — велізарны гонар. Мы стараемся быць сімваламі нашай маленькай краіны і ўсяляць у яе надзею, таму што цяпер там даволі змрочны перыяд».
Савар упершыню дэбютаваў на Кубку свету толькі ў студзені 2023-га, а затым выступаў на чэмпіянатах свету. Выступіць на Алімпіядзе яму дапамагла стыпендыя праграмы «Алімпійская салідарнасць», якая падтрымлівае спартсменаў з усіх куткоў планеты.
Цяпер чытаюць
Загінуў былы палітвязень Аляксей Ляўкевіч. Яго вызвалілі тры месяцы таму пасля візіту Коўла2
Загінуў былы палітвязень Аляксей Ляўкевіч. Яго вызвалілі тры месяцы таму пасля візіту Коўла
Пасол Украіны па пытаннях Беларусі адказаў на дыскусію Вячоркі і крытыкаў Ціханоўскай: Ваша ўзаемная непрымальнасць адыгрывае вельмі неканструктыўную ролю3939
Каментары