«Жорсткі лофт». У «Мінск-Свет» здаюць студыю з голымі сценамі — людзі шакаваны цаной
Рынак сталічнай арэнды не перастае здзіўляць.
У Мінску здаецца студыя агульнай плошчай 26 квадратаў па адрасе Шчамялёва, 30. Яна месціцца на 14‑м паверсе 25‑павярховіка, пабудаванага летась.
У адрозненне ад некаторых іншых кватэр, якія здаюць без рамонту, гэтае памяшканне так-сяк падрыхтавана для жыцця. На падлозе ляжыць ламінат. У асноўным пакоі ёсць кухонная зона з умывальнікам, сталешніцай і пераноснай электрапліткай на дзве канфоркі.
Самі шафікі, відаць, сабраныя з неліквідных частак, бо дзверцы рознага колеру. Маюцца халадзільнік, стол і дзве табурэткі. У ванным пакоі, апроч самой ванны і туалета, стаіць пральная машына. Але для жыцця там як мінімум трэба дадаць шафу і ложак.
У апісанні пазначана, што кватэра здаецца на працяглы тэрмін, у ёй можна жыць з жывёламі. Здаецца па дамове, патрэбны залог.
За месяц пражывання ў такой кватэры просяць 280 даляраў.
Аб’яву актыўна абмяркоўваюць у Трэдс. Допіс набраў ужо каля 165 тысяч праглядаў і больш за сотню каментароў.
Многія жартуюць, што ў кватэры зроблены рамонт у стылі лофт: «Жорсткі лофт», «Гэта лофт. Вы не шарыце», «Лофт Pro Max».
Таксама каментатары задаюцца пытаннем, навошта патрэбны залог у такой кватэры. «Залог за што, прабачце? Арэндадаўца перажывае, што вы цэглу вынесеце?» — задаецца пытаннем карыстальніца. «Дзіўна, забыліся ж дапісаць, што без жывёл і без дзяцей», — дадае іншая каментатарка.
Але ёсць і тыя, хто лічыць, што кватэра знойдзе свайго арэндатара. «І на такое свой кліент знойдзецца… за 250 у.а. дакладна здадуць… Пара ўжо прыезджым прывыкаць, што жыць у Мінску дорага», — адзначае адзін з карыстальнікаў.
«Хацелася б хоць нейкія дзверы ў санвузел. Але калі выбіраць паміж «бабушатнікам» і гэтым, я б выбрала гэта», — рэзюмуе яшчэ адна дзяўчына.
Цяпер чытаюць
Той самы масажыст расказаў, навошта здымаў голых кліентак2
Каментары