Вялікабрытанія і Германія адмовіліся адпраўляць караблі ў Армузскі праліў
Вялікабрытанія і яшчэ некалькі еўрапейскіх краін не падтрымалі заклік прэзідэнта ЗША Дональда Трампа накіраваць вайсковыя караблі для разблакавання Армузскага праліва. Трамп перад тым папярэдзіў, што для НАТА будзе дрэнным знакам, калі саюзнікі адмовяцца дапамагчы ў ахове гэтай важнай марской артэрыі, піша The Moscow Times.
Раней прэзідэнт Францыі Эмануэль Макрон заяўляў пра магчымасць накіравання ў рэгіён авіяноснай групы. Аднак Вялікабрытанія, Германія, Грэцыя, Італія, Іспанія і Люксембург выступілі супраць пашырэння вайсковага ўдзелу ў канфлікце вакол Ірана.
Брытанскі прэм’ер Кір Стармер адзначыў, што ягоная краіна не хоча ўцягвацца ў маштабную вайну. Паводле яго слоў, Лондан разам з саюзнікамі шукае калектыўнае рашэнне, якое дапаможа аднавіць працу Армузскага праліва і стабілізаваць нафтавы рынак. Пры гэтым Вялікабрытанія ўжо размясціла ў рэгіёне аўтаномныя сістэмы для пошуку марскіх мін.
Міністр абароны Германіі Барыс Пісторыус таксама адхіліў патрабаванне ЗША адправіць флот у гэты раён, заявіўшы, што гэта не вайна Германіі. Нямецкія ўлады лічаць, што канфлікт трэба як мага хутчэй завяршыць дыпламатычным шляхам, а павелічэнне вайсковай прысутнасці толькі ўскладніць сітуацыю. Раней кіраўнік МЗС Германіі таксама падкрэсліваў, што Берлін не будзе ўдзельнічаць у ваеннай аперацыі ў гэтым рэгіёне.
Грэцыя таксама заявіла, што не плануе праводзіць ніякіх ваенных аперацый у Армузскім праліве. Афіны гатовыя ўдзельнічаць толькі ў місіі Еўрасаюза па абароне суднаў у Чырвоным моры.
Іспанія таксама адмовілася падтрымліваць ваенныя дзеянні. Міністр абароны Маргарыта Роблес заявіла, што галоўная мэта павінна заключацца ў як мага хутчэйшым спыненні вайны, а не ў яе пашырэнні. Міністарка замежных спраў Іспаніі дадала, што краіна не будзе рабіць крокаў, якія могуць яшчэ больш абвастрыць сітуацыю.
Сумненні наконт пашырэння ваенных місій у гэтым раёне выказаў і віцэ-прэм’ер Італіі Антоніа Таяні.
Супраць адпраўкі войскаў выступіў і Люксембург. Намеснік прэм’ер-міністра Ксаўе Бетэль заявіў, што краіна не паддасца ціску і шантажу з боку ЗША. Паводле яго слоў, Люксембург можа дапамагчы ў галіне сувязі або спадарожнікавых тэхналогій, але не будзе накіроўваць у рэгіён войскі ці вайсковую тэхніку.
Трамп: Калі НАТА адмовіцца дапамагаць з Армузскім пралівам, Альянс чакае «вельмі дрэнная будучыня»
Вайна з Іранам — залатая жыла для амерыканскіх нафтавікоў
Міністр замежных спраў Ірана: Армузскі праліў закрыты толькі для ворагаў, астатнія могуць праходзіць
Трамп заклікаў краіны, якія пацярпелі ад закрыцця Армузскага праліва, накіраваць туды вайсковыя караблі
Цяпер чытаюць
На поўначы Беларусі існавала велізарнае возера — у 150 разоў большае за Нарач. Яно знікла ў выніку прыроднай катастрофы, але сляды заўважныя і сёння66
Каментары