Іран выпусціў банкноту найбуйнейшага ў гісторыі краіны наміналу. Гэта ўсяго 7 даляраў па курсе
Банкноту на 10 мільёнаў рыалаў выпусцілі на хвалі ажыятажнага попыту на наяўныя грошы.
Цэнтральны банк Ірана выпусціў у абарачэнне банкноту на 10 мільёнаў рыалаў — гэта самы буйны намінал у гісторыі краіны. Але гэта ўсяго каля 7 даляраў ЗША, піша Financial Times.
Раней самай вялікай купюрай было 5 мільёнаў рыалаў. Яе ўвялі ў абарачэнне ў пачатку лютага.
Новая купюра патрэбна, каб забяспечыць доступ грамадскасці да наяўных грошай, заявіў Цэнтрабанк.
У Іране цяпер ажыятажны попыт на наяўныя грошы, бо людзі баяцца, што электронныя плацежныя сістэмы могуць перастаць працаваць. Іранцы стаяць у чэргах у банкі, каб зняць грошы з рахункаў. А банкі ўводзяць ліміты на выдачу наяўных.
У пачатку лютага інфляцыя ў Іране, па афіцыйных даных, складала 47,5% у гадавым вымярэнні.
Каментары