З Беларусі ўжо выехалі каля 700 літоўскіх грузавікоў, яшчэ 300 аплацілі стаянку
Больш за тысячу грузавікоў з літоўскай рэгістрацыяй, якія знаходзіліся на спецыяльных стаянках у Беларусі, ужо аплацілі паслугі захоўвання. Аднак фактычна праз беларуска-літоўскую і беларуска-польскую мяжу змаглі выехаць каля 700 фур, а яшчэ прыкладна 300 усё яшчэ чакаюць магчымасці ўехаць у Літву, паведамляе Дзяржаўны памежны камітэт.
Здымак ілюстрацыйны. Фота: Lookby.media
Беларускія памежнікі ўскладаюць віну за тое, што працэс адбываецца не надта хутка, на літоўскі бок: маўляў, павольна працуюць, хоць маглі б нібыта хутчэй.
Раней паведамлялася, што больш за 1900 грузавікоў, затрыманых у лістападзе 2025 года, атрымалі магчымасць выехаць з Беларусі пасля адпаведнага рашэння Лукашэнкі, прынятага пасля сустрэчы са спецыяльным прадстаўніком прэзідэнта ЗША Джонам Коўлам.
Каментары