Касмічны карабель «Арыён» сыходзіць з арбіты Зямлі і адпраўляецца да Месяца

Касмічны карабель «Арыён», які ляціць да Месяца ў рамках місіі «Артэміда-2» з чатырма астранаўтамі на борце, сыходзіць з арбіты Зямлі і накіроўваецца ў бок яе спадарожніка.

Як і было запланавана, каля 19:49 па часе Усходняга ўзбярэжжа ЗША (02:49 па Мінску), рухавікі «Арыёна» ўключыліся і правялі так званы «трансмесяцавы інжэкцыйны імпульс», гэта значыць надалі караблю паскарэнне.

Яны працавалі на працягу прыкладна шасці хвілін, у выніку чаго карабель пачаў пакідаць зямную арбіту. Гэта адзін з ключавых этапаў місіі, паколькі пасля яго караблю цяжка павярнуць назад да Зямлі.

«Чалавецтва зноў паказала, на што яно здольна, — сказаў пасля імпульсу Джэрэмі Хансен, астранаўт Канадскага касмічнага агенцтва. — Нашаму шляху да Месяца дапамагаюць вашыя надзеі на будучыню».

Пазней члены экіпажа паведамілі, што ім адкрыўся вельмі прыгожы від на ценевы бок Зямлі.

Супрацоўнікі НАСА сказалі на прэс-канферэнцыі, што імпульс прайшоў бездакорна.

«З вялікай радасцю магу вам паведаміць, што ўпершыню з 1972 года, калі праходзіла місія «Апалон-17», людзі пакінулі арбіту Зямлі», — сказала журналістам прадстаўнік НАСА Лоры Глейз.

Пазней члены экіпажа правялі сваю першую касмічную прэс-канферэнцыю: яны адказалі на пытанні амерыканскіх тэлеканалаў.

Астранаўт Крысціна Кох прызналася, што менавіта ёй даводзілася займацца рамонтам бартавога туалета, і дадала: «Люблю казаць, што [вантуз] — гэта самы важны інструмент у космасе». Яна патлумачыла, што пасля некаторых непаладак цяпер гэты вузел працуе.

Падчас прэс-канферэнцыі перад астранаўтамі плавала мяккая цацка-талісман місіі, якую намаляваў васьмігадовы жыхар Сан-Францыска Лукас Йі.

Павялічыць

Да гэтага «Арыён» паспяхова раскрыў сонечныя панэлі, а праз некаторы час зрабіў манеўр, які вывеў яго на высокую калязямную арбіту — там экіпаж правёў серыю выпрабаванняў карабля, піша Бі-бі-сі.

Перад імпульсам «Арыён» зноў наблізіўся да Зямлі: у момант паскарэння ён знаходзіўся ад яе на адлегласці каля 185 км.

Цяпер пачаўся шлях карабля з астранаўтамі ў бок Месяца, да якога яны павінны прыбыць у панядзелак, 6 красавіка. Пасадкі на зямны спадарожнік у рамках місіі не будзе, «Арыён» толькі праляціць вакол яго.

Чатыры астранаўты — тры амерыканцы і адзін канадец — стануць першымі ў гісторыі людзьмі, якія на ўласныя вочы ўбачаць адваротны бок Месяца.

Затым яны пачнуць зваротны шлях да Зямлі, якому дапаможа натуральная гравітацыя Месяца. Такім чынам цяперашні імпульс адначасова дазволіць караблю дасягнуць Месяца і вярнуцца на Зямлю.

• 14
• 0
• 0
• 0
• 0
• 0
• 0
• 0