Анжаліка Мельнікава пасля знікнення набыла дзве кватэры ў Мінску

Экс-спікерка Каардынацыйнай рады Анжаліка Мельнікава перастала выходзіць на сувязь 25 сакавіка 2025 года, адначасова з ёй зніклі больш за 150 тысяч даляраў, прызначаных для КР і «Кіберпартызан». «Люстэрка» высветліла, што ўжо пасля знікнення ад імя Мельнікавай было заключана некалькі здзелак з нерухомасцю ў сталіцы.

@nashaniva Мельнікава, якая знікла з грашыма, купіла дзве кватэры #новостибеларуси #беларусьновости #беларусьсейчас #мельникова #минсксейчас ♬ News / Truth Investigation / Investigation / Suspicion / Consideration(1013150) - A.TARUI

З дакументаў вынікае, што праз паўгода пасля знікнення — у верасні 2025 года — Анжаліка стала ўласніцай аднапакаёвай кватэры ў Мінску. Жыллё знаходзіцца на праспекце Любімава, яго плошча складае 33,8 квадратнага метра.

Цэны на падобныя кватэры ў гэтым раёне — ад 208 тысяч рублёў (каля 71 тысячы даляраў) да 240 тысяч рублёў (82 тысячы даляраў).

Пазней у студзені 2026 года экс-спікерка КР купіла і аформіла на сябе яшчэ адну кватэру на вуліцы Пятра Мсціслаўца ў ЖК «Маяк Мінска» ў мікрараёне Усход. Па паперах у ёй таксама адзін пакой, плошча — неверагодныя для аднапакаёўкі 91,8 квадратнага метра.

Такая ж плошча, як у новай кватэры Анжалікі, — у чатырохпакаёвай кватэры ў гэтым комплексе, якую цяпер прадаюць за 1,1 мільёна рублёў (400 тысяч даляраў). За трохпакаёўку меншай плошчы ў «Маяку» просяць 643 тысячы рублёў (219 тысяч даляраў), прасторная двухпакаёўка выстаўлена на продаж за 572 тысячы рублёў (195 тысяч даляраў).

Яшчэ адной кватэрай у сталіцы Мельнікава з 2016 года валодала сумесна з мужам і была ў ёй прапісана. Кіраўнік аб’яднання былых сілавікоў «Байпол» Аляксандр Азараў паведамляў, што ў красавіку 2024 года дома ў Мельнікавай у Мінску быў ператрус, сама яна тады атрымлівала пагрозы.

Па інфармацыі крыніцы «Люстэрка», у маі 2024 года на гэту кватэру быў накладзены арышт. Тады Следчы камітэт завёў крымінальную справу ў дачыненні да 257 удзельнікаў маючых адбыцца выбараў у Каардынацыйную раду трэцяга склікання, Анжаліка была ў іх ліку.

Аднак у лютым 2026 года арышт знялі пастановай таго ж СК. Праз месяц кватэра перайшла ў аднаасобную ўласнасць Мельнікавай. Падставай для гэтага стала пагадненне аб падзеле сумеснай уласнасці мужа і жонкі. Як правіла, падставай для афіцыйнага падзелу маёмасці становіцца развод.

Былая спікерка Каардынацыйнай рады Анжаліка Мельнікава знікла ў сакавіку 2025 года. У апошні раз яе бачылі на Шры-Ланцы, куды ў той жа час прыязджаў Аляксей Лабееў — 32‑гадовы мужчына, з якім у Мельнікавай былі адносіны і які з’яўляецца, як высветлілі журналісты, супрацоўнікам Упраўлення ваеннай контрразведкі КДБ.

• 7
• 0
• 36
• 23
• 3
• 3
• 6
• 0