У Гродзенскім заапарку стары воўк памёр, дачакаўшыся ваўчанят сабе на замену
У Гродзенскім заапарку з’явіліся два новыя жыхары — ваўчаняты Чук і Гек. Іх прыбыццё стала працягам кранальнай гісторыі, звязанай з легендарным мясцовым ваўком Цяплонам, піша прэс-служба заапарка.
Яшчэ ў 2009 годзе ў заапарку пасялілася пара ваўкоў — Цяплон і Петра. Жывёлы доўгія гады жылі разам у спакоі і дастатку. Аднак некалькі гадоў таму Петра памерла ва ўзросце 16 гадоў, і Цяплон застаўся адзін.
Супрацоўнікі заапарка пачалі шукаць для яго новых суседзяў, але зрабіць гэта было няпроста. Хоць ваўкоў у Беларусі хапае, дамоўленасці аб перадачы ваўчанят па розных прычынах пастаянна зрываліся.
Тым часам Цяплон старэў. Ён стаў горш бачыць і чуць, у яго ўзніклі праблемы з заднімі лапамі. Тым не менш стары воўк да апошняга заставаўся дастаткова моцным і самастойна харчаваўся.
Напрыканцы мая нарэшце з’явілася магчымасць прывезці ў заапарк двух ваўчанят. Але пасля таго як усе неабходныя дакументы былі аформленыя, Цяплон упершыню за ўсё жыццё адмовіўся ад ежы. На наступны дзень супрацоўнікі заапарка паехалі забіраць новых гадаванцаў, а стары воўк тым часам ціха памёр.
У заапарку лічаць гэтую гісторыю асаблівай. Там упэўненыя, што Цяплон нібыта чакаў менавіта гэтых ваўчанят, каб перадаць ім сваё месца і пакінуць пасля сябе годную змену.
Цяпер у вальеры, дзе калісьці жылі Цяплон і Петра, асвойваюцца маладыя ваўкі Чук і Гек. Новых насельнікаў ужо лічаць паўнапраўнымі членамі вялікай сям’і Гродзенскага заапарка.
Каментары