«А як карміць, хлебам хіба?» У магілёўскім заасадзе дзеці глядзелі на адсечаную галаву казулі ў ваўчыным вальеры
Аўтарка роліка абурылася тым, што дзеці, якія прыйшлі паглядзець на жывёл, бачаць «бойню». Паводле яе слоў, усе былі ў шоку і адразу адводзілі малых ад вальера. Гісторыю заўважыў «МагілёўАнлайн».
«Гэта жах!» — кажа жыхарка Магілёва, якая падзялілася відэа ў Threads. Яна падпісала яго так: «Людзі прыводзяць дзяцей у заасад, каб глядзець на жывёл. Замест гэтага мы бачым што? — Адарваная галава і сыты побач воўк».
Высветлілася, што гісторыя адбылася ў Магілёўскім заасадзе ў Буйнічах.
Нехта заўважыў, што лепш наогул не хадзіць у «падобныя нізкагатунковыя заапаркі». Ды і ў цэлым яны, як і цыркі — месцы пакут жывёл. Таму няхай не дзівіцца адарваным галовам.
Але большасць заступілася за ваўка і дырэкцыю. «Думаю, ён быў абсалютна шчаслівы атрымаць такую цацку». І ў звярынцы людзі прыходзяць «якраз для таго, каб паглядзець на сапраўдных жывёл». «Калі баіцеся за сваё дзіцятка, то няхай глядзіць мульцікі, дзе поні ядуць вясёлку і какаюць матылькамі», — напісаў карыстальнік Threads.
«Там павінна талерка з вілкай быць?» — задала рытарычнае пытанне адна жанчына.
«Сапраўды, ваўкі ж кветачкі ядуць. Якія далікатныя ўсе сталі», — дадала другая.
Некаторыя звярнулі ўвагу, што галоўны аб'ект тут — зусім не галава казулі ці воўк, а вальер: «Ён вас у стан шоку не ўводзіць?»
Выданне звязалася з загадчыкам Магілёўскага заасада Іванам Ніжнікавым. Той адказаў, што ваўкоў кормяць менавіта так. Прычым не толькі ў Магілёве, а ва ўсіх заапарках свету.
«Драпежнай жывёле абавязкова патрэбна кроў», — кажа суразмоўца. І яны яе атрымліваюць рознымі спосабамі. Адкуль бяруць ахвяр?
«Казуль забіраем з ДТЗ, робім аналізы і даем жывёлам — гэта дазволена. Часам рассякаем галовы, часам не, — патлумачыў загадчык. — А як карміць, хлебам хіба, або сабачым кормам ваўка? Проста, магчыма, супрацоўніцы не паспелі прыбраць». Ласі, алені і дзікі, якія трапілі пад колы, таксама ідуць на харчаванне пастаяльцаў заасада, «каб не выкідваць». І гэта, як тут лічаць, нармальна.
Часам рацыён драпежнікаў разбаўляюць галовамі і лапамі курэй, субпрадуктамі, а то і трусамі з марскімі свінкамі. Іх персанал спецыяльна вырошчвае для гэтых мэтаў на сваёй тэрыторыі.
Каментары